طرق مجنونة تخليك تلم المنهج في أقل من 12 ساعة
الامتحانات هتبدأ وعايز تلم المنهج بس مش عارف تعمل ده إزاي.. مفيش قدامك حل غير الطرق المجنونة عشان تنجز وتخلص أي مادة انت متأخر فيها في أقل من 12 ساعة مذاكرة.
قبل ما تقرأ الموضوع لازم تعرف إن الأفكار دي عايزة حد مجنون وقلبه ميت شويتين :)
استبعد
هات امتحانات آخر 10 سنين وشوف الموضوعات اللي تناولتها الامتحانات دي، وذاكر الموضوعات دي بضمير واستبعد الباقي.. معظم الامتحانات بتتناول أهم الموضوعات اللي في المنهج، من خلال امتحانات السنين اللي فاتت هتقدر تعرف إيه أهم الموضوعات اللي تذاكرها كويس، وإيه الأجزاء اللي هتحتاج تبص عليها بصه سريعة أو تستبعدها نهائيا.
الطريقة دي هتاخد من 5 لــ 10 ساعات
قطع الكتاب
لو أنت مش عايز تستبعد حاجه فمش قدامك حل غير إنك تقطع الكتاب.. أيوه تقطع الكتاب أنت و3 من أصحابك مثلا لأربع أجزاء.. في 3 ساعات كل واحد يقرأ الجزء بتاعه ويفهمه كويس ويلخصه في 10 ورقات بالكتير.
بعد كده، اللي معاه الجزء الأول يشرح ليكم الجزء بتاعه في ساعة، بعدين التاني، والتالت، والأخير.. فهمتو المادة الحمد لله في 7 ساعات. دلوقتي جمعوا التلخيص وكل واحد ياخد نسخة منه، واعملوا الخطوة اللي فوق.. أيوه الاستبعاد.. ركز على أهم الموضوعات اللي تناولتها امتحانات آخر 5 سنين بس.
الطريقة دي هتاخد من 7 لــ 12 ساعة
قسم وكلم نفسك
هات كشكول جديد، وادخل الأوضة وقسم الكتاب بتاعك لأجزاء.. مثلا لو هو 4 أبواب حدد وقت لكل باب تذاكره فيه ( كل باب ساعتين مثلا).. بعد ما قسمت الكتاب وكتبت الخطة بتاعتك في الكشكول، خدلك «بريك» نص ساعة بقى قبل ما تبدأ،
خلص الـ«بريك» ابدأ مذاكرة في الجزء الأول.. اختصر الجزء لعناصر في الكشكول، واشرح لنفسك بصوت عالي أي نقطة حاسس إنها مش داخلة دماغك بسهولة.. لو لسه مرخمة حاول تركبها على أغنية بتحبها مثلا. لو خلصت قبل الوقت اللي انت محدده ما يخلص خدلك «بريك» نص ساعة اعمل فيه أي حاجه انت بتحبها.. لو تجاوزت الوقت خدلك «بريك» ربع ساعة بس.
لما تخلص جزء وتبدأ في اللي وراه، حاول تكلم نفسك بصوت مسموع لو ده جايب نتيجة معاك وتربط اللي بتقراه بالجزء اللي فات.. يعني لو الجزء الأول قلك الطعن على حكم صادر من محكمة القضاء الإداري بيكون في خلال 60 يوم مثلا.. وفي الجزء اللي وراه قلك إن الطعن اللي قدمه (س) بعد 70 يوم من الحكم اترفض.. قول بصوت عالي «الطعن اترفض لإن الطعن على أي حكم صادر من محكمة القضاء الإداري بيكون خلال 60 يوم» وارجع اتأكد من معلومتك لو صح معنوياتك هترتفع.. دوس بنزين بقى :)
الطريقة دي هتاخد من 8 لــ 12 ساعات
أسلوب المترو
الاسلوب ده باختصار هو إنك تذاكر الكتاب كله ولكن بأسلوبين في وقت واحد، هتعمل زي المترو وتمشي بسرعة يعن تقرأ بسرعة الحاجه سهلة الفهم بالنسبالك وتكتبها عناصر رئيسية بس في كشكول جديد، ولما يقابلك جزء مهم «محطة» لازم تقف وتديله حقه وتكتب عناصره بشرح مختصر لكل عنصر.
خد بالك وانت ماشي سريع زي المترو لازم تكون العناصر اللي معدي عليها بسرعة دي في الأساس مفهومة ليك من غير شرح، والمحطات اللي بتقف فيها دي هي اللي عندك مشكلة معاها فلازم تكتب شرح لكل عنصر.
الطريقة دي هتاخد من 4 لــ 8 ساعات
نصيحة أخيرة
لو انت مش بتعرف تذاكر غير وحدك، ابدأ بأسلوب المترو، ولو لسه معاك وقت طبق سياسة الاستبعاد.. لو عندك طريقة مذاكرة كويسة ممكن تفيد بيها غيرك ابعتلنا على الإيميل ده share.shbabbek@gmail.com.
