تعرف إيه عن «اليوجا»؟.. الرياضة مش التبليم
أول ما بنسمع كلمة «يوجا» بيجي في بالنا على طول المشهد بتاع أحمد رمزي وجارته في فيلم «عائلة زيزي» لما كانوا بيعملو «يوجا»، يعني تفضل قاعد مربع رجليك، وقافل كام صوباع في ايدك، وتبص قدامك، وماتتحركش لمدة نص ساعة، وكده تبقى نفذتها تمام...ايه رأيك بقى أن دي مش يوجا خالص!
-
اليوجا تمرين
اليوجا هي شوية تمارين، تمارين بجد، يعني تقوم وتقعد، وتفرد ايدك، وترفع رجلك، وكل ده ببطئ جدا وبراحة، وبيبقى لك مدرب يقولك تعمل ايه وتقوم ازاي، وبحركات محددة جدا، ولها أوضاع معينة، يعني تضم رجلك على خصرك، وايدك مفرودة بوضع معين، ورأسك ملوية في اتجاه اليمين أو الشمال، وترجع تفرد رجلك واحدة واحدة و زي ما بيقولك المدرب، وكمان بتسمع موسيقى هادئة وانت بتعمل التمرينات دي.
-
اليوجا أنواع
زي ما اليوجا مش قعدة وتبليم وبس، فهي كمان مش تمارين وبس، لكنها أنواع وكتير جدا، منها:
الاشتانجا
يعنى عندك "يوجا الاشتانجا" اللي بتعتمد على الإيقاع السريع والحركة البدنية القوية ودي للي عايز يقوي عضلات جسمه.
الفينياسا
وعندك «الفينياسا» اللي بتعتمد على شوية تمارين مع تنظيم التنفس وانت بتعمل التمارين برده ودي للي بيحب الايقاع الهادئ والمنظم.
الهاثا
وكمان "يوجا الهاثا" اللي بتعتمد على التأمل والاسترخاء خلال ممارسة التمارين واللي اكتشف العلماء أنها بتنشط الدماغ بشكل غريب.
-
فوايدها
اليوجا كمان لها فوايد، بتخلصك من كل الضغوط وشد الأعصاب اللي بتشوفه كل يوم، وتنقلك لعالم هدوء واسترخاء جامد جدا، كمان بتقوي العضلات وتخفف الشد العضلي وتشد الجسم وتمنع الترهل وتقلل من الاصابة بالسكتة القلبية والدماغية، وتحسن من نشاط المخ والذاكرة، وتخفف من إصابتك بشوية امراض نفسية زي التوتر والقلق والاكتئاب.
-
أماكن ممارستها
تقدر تمارس "اليوجا" في مراكز كتير في مصر، ومع مدربين محترفين اوي كمان
مركز 35ب
ده مركز صغير للبنات بس موجود في الزمالك، وله بيدج على الفيسبوك بينزل فيه كل المواعيد والأنشطة وكل حاجة، بتدرب فيه المدربة"هنا كمال"، ممكن تشوفه من هـــــنــــــا
مركز شانتي يوجا
ده بقى مركز مختلط سيدات ورجالة يعني، موجود في عمارات العبور بصلاح سالم، وبرده له الصفحة بتاعته على الفيسبوك بينزل فيها المواعيد عشان تختار الميعاد اللي يناسبك، وممكن كمان تعمل اشتراك، عشان تعرف اكتر شوف البيدج من هــــنــــا
المركز الثقافي الهندي
كمان المركز الثقافي الهندي (مركز مولانا زاد) بيقدم كورسات تعليم وممارسة اليوجا على اصولها بقى، لأن "اليوجا" أصلها هندي، شوفت لما رئيس الوزراء الهندي نزل في اليوم العالمي لليوجا في الهند وعمل مع الشعب تمرينات يوجا، المهم المركز ده موجود في وسط البلد، اسأل وشوف مواعيدهم امتى وروح.
يلا جرب واهرب من الزحمة وضغوط الدراسة والشغل والحياة واتبسط بقى ياعم!
