بتنسى؟.. هذه العادات تنشط ذهنك
لو عايز تحافظ على مخك نشيط وتبقى دايما مركز وفاكر التفاصيل، دي حاجات سهلة وبسيطة هتساعدك مخك دايما يكون نشيط وتفتكر المعلومات بسرعة.
القراءة
اقرا كتب أو مجلات أو روايات أو جرايد، أيا كان نوع القراءة المفضل ليك، فالقراءة خاصة لو حاجة بتحبها، هتضيفلك معلومات جديدة، غير أنها هتحفز مخك على إنتاج أفكار جديدة أو على الأقل التفاعل مع مواضيع جديدة.
اتعلم كلمات جديدة
من الطرق الفعالة جدا في تنشيط الذاكرة هي إنك تتعلم كلمات جديدة مش شرط تكون في لغة أجنبية، ممكن تكون في لغتك الأصلية، وحتى لو كلمة واحدة كل يوم، وبعد أسبوع مثلا راجع الكلمات دي وحاول تستخدمها في الكلام أو الكتابة.
اكتب
الكتابة هتساعد في تنشيط مخك وذاكرتك، ممكن تكتب أحداث اليوم أو تكتب قصة خيالية أو شعر أو تطلع أفكارك على الورق، الكتابة بتتطلب حضور الذهن وبتدفع مخك أنه يفكر في تكوين الجُمل والعبارات.
العب "سودوكو" أو Puzzle
ألعاب الـ puzzle والسودوكو ممكن تلاقيها على النت أو في الجرايد اليومية، غير تنشيط المخ فهي كمان بتساعد على حرق الدهون والكالوريز الزيادة.
العب شطرنج
الشطرنج لعبة سهل تتعلمها وتلعبها، وهتساعدك تنشط مخك لأنها بتتطلب درجة عالية من الذكاء والتركيز.
اخترع وفك وركب الآلات الصغيرة
جرب تفك حاجة بسيطة بإيديك أنت وتعيد تركيبها تاني، أو جرب تصلح حاجة مش شغالة في البيت.
اتعرف على ناس جديدة
اخرج مع ناس جديدة واتعرف على معتقداتهم وأفكارهم وحياتهم، دا هيساعدك توسع تفكيرك لما تشوف ناس مختلفين عنك بأفكار مختلفة.
