أنا اتخرجت.. اكتب إيه في الـCV ؟
بعد التخرج بنواجه مشكلة حقيقية في كتابة السيرة الذاتية (CV) لأن كتير منا بيكون ما اشتغلش وقت الدراسة، وبالتالي مش عارف يكتب إيه بالظبط، وإيه الخبرات اللي عنده، ويعرف نفسه إزاي لصاحب العمل عن طريق الـ CV بتاعه.
"شبابيك" هيعرفك تكتب إيه بالظبط وبالترتيب كمان:
- البيانات الأساسية
ابدأ بكتابة اسمك ورقم تليفونك والايميل الخاص بك وعنوانك في بداية الـ CV، وكمان ممكن تحط كل ده جوه مربع أو تكتبه في نص الورقة من فوق خالص، لأن بياناتك الاساسية هي أهم حاجة صاحب العمل هيدور عليها لو عاوز يكلمك ويعمل معاك مقابلة شخصية.
الاسم:.........
التليفون:.......
الايميل:.........
العنوان:........
- المؤهل الدراسي
طبعا لو مش عندك خبرات في مجال العمل يبقى هتكتب على طول المؤهل الدراسي، مؤهل الجامعة يعني اسم الجامعة واسم الكلية والقسم اللي اتخصصت فيه وسنة التخرج والتقدير العام كمان، وممكن تضيف تخصص مشروع التخرج بتاعك وتقديرك فيه.
اسم الجامعة:......الكلية:.........القسم:..........سنة التخرج:........تقدير:.........
بحث التخرج:.........تقدير:........
- الدورات التدريبية
لو التحقت بدورات تدريبة أثناء الدراسة سواء في مجالك أو لا، اكتبها في الـ CV، هتكتب اسم الدورة والمكان اللي خدتها فيه والمدة، وترتب من الأقدم للأحدث.
اسم الدورة:.......اسم المركز:..........مدة الالتحاق:...........
- اللغات
موضوع اللغات مهم جدا لأن صاحب العمل بيدور على لغة كمان، فلو الانجليزي بتاعك كويس، اكتب أن عندك انجليزي، لو عندك لغة كمان يبقى حلو أوي، وطبعا هتكتب مستواك في أي لغة قد ايه، وبجد مش مبالغة، كمان اكتب لغتك الأم يعني أنت بتتكلم ايه لأن في ناس أصولها مش مصري والعربي بتاعها مش قد كده، فاكتب لغتك الأصلية ومستواك فيها كمان
اللغة الأولى:.......: ______(جيد- جيد جدا- ممتاز)
اللغة الثانية:.......:_______
اللغة الأم:........:._______
- المهارات
المهارات بقى بتتقسم لنقطتين:
مهارات الحاسب الآلي
هتكتب فيها كل حاجة بتعرف تعملها على الكمبيوتر من أول أنك بتعرف تستخدم ميكروسوفت أوفيس (وورد- باوربوينت- اكسيل) لحد أنك بتستخدم الانترنت ومواقع السوشيال ميديا، ولو عارف برامج إضافية (فوتوشوب مثلا) أو غيرها، اكتبه، يعني كل تفصيلة بتعرف تعملها اكتبها.
مهارات شخصية
هتكتب هنا مهاراتك الشخصية يعني كل حاجة حلوة في شخصيتك زي مثلا التزامك بالمواعيد وتنظيم الوقت وغيره، بس اعرف تكتب ايه فين، يعني لو انت بتقدم على وظيفة "موظف تسويق" أو "مبيعات" يبقى تكتب قدرتك على الإقناع والتفاوض والصبر والتعامل الجيد مع الأخرين وكده، لكن خد بالك ما تكتبش نفي لأي صفة يعني مثلا ما ينفعش تكتب "غير عصبي" اكتب "صبور"
- الأنشطة
لو اشتركت في أي أنشطة تطوعية أيا كانت لازم تكتبها لأنها هتدي انطباع حلو عنك عند صاحب العمل، بتتحرك يعني واجتماعي ونشيط، طبعا هتكتب اسم المؤسسة اللي تطوعت فيها والنشاط اللي شاركت فيه والمهام بتاعتك كانت ايه بالظبط والفترة اللي قضيتها معاهم.
اسم المؤسسة:.........النشاط:............المهام:...................(في الفترة من.....إلى......)
- المسابقات والجوائز
كمان لو كنت نشيط وشاطر شوية واشتركت في مسابقات سواء تبع الجامعة أو بره الجامعة اكتبها، ولو حصلت على جائزة أو مركز اكتبه طبعا، ولو ما حصلتش على جائزة مش مشكلة اكتب المسابقة اللي اشتركت فيها والمكان اللي عمل المسابقة والفترة اللي اتعملت فيها بس
اشتركت في مسابقة......بمركز\ جامعة..........عام........وحصلت على المركز\ جائزة......
أهم حاجة في كل ده أن الكلام يكون منسق ومنظم وبخط واحد من غير ألوان، وما تنساش تحط صورتك فوق خالص جنب الاسم، وكمان الملف يكون Pdf مش word، وبالتوفيق بقى!
