كائنات الجامعة اللطاف.. من «بواخه» بتاع الأمن للعميد «حضرة الناظر»
لو إنت فاكر إنك أول ما هتروح الجامعة هتلاقي فروض الولاء والطاعة والمساعدة بتجيلك تسهلك كل أمورك وطلباتك؛ فإنت غلطان الجامعة زيها زي أي مصلحة حكومية فيها الموظف التقيل إللي ماشي بقوة دفع الروتين المصري، وفيها السمح إللي يشوفك يرتحالك وتصعب عليه "وده قليل".
في الجامعة خد بالك من كائنات الجامعة اللطاف، من أول بتاع الأمن إللي بيستنصح عليك لحد عميد الكلية وكلمته المعتادة.
- الأمــن عندك رجال الأمن في أي جامعة مقسومين نصين النص الأول منهم ابن البلد المجدع لو لقاك متأخر عن المحاضرة وبتجري بيدخلك على طول من غير تفتيش أو حتي يبص في الكارنيه؛ أما النص التانى أرخم خلق الله من بتوع "إسم الكريم إيه؟ إسمي بواخه" دول لو إنت عندك امتحان وبيشفوك بقالك 3 سنين هيقولك برده فين الكارنيه..من أولها إعرف أنواعهم صاحب الأول وتجنب التاني.
- الشــؤون
الموظف ده خلقه ضيق كل دقيقه بيدخله طالب يسأل ويحاور فطبعا مش هيكون فاضي لسيادتك وإنت داخل عايز تفهم كل صغيرة وكبيرة في ملفك لو كان ناقص أو عايز تحول من كلية لكلية..فكبر دماغك وحاول تروحله الصبح بدري أول ما يجي عشان يكون رايق.
- مـوظـف المكتبـة
في كتير يقولك إيه إللي هيدخلني المكتبة؛ لا حاسب المكتبة في الجامعة مش زي ما أنت فاكر مجموعة كتب وورق لما تحتاج مكان تذاكر فيه تروحلها.. المكتبة بالموظف بتاعها مهمين جدًا .. أوًلا عشان تصوير ورقك؛ موادك الدراسية والدكاترة وطبايعهم ؛ بجانب كل صغيرة وكبيرة لملفك و أوراق تحويلك وأي حاجة تخص الكلية هيكون الموظف فاضي وأكتر واحد بيفيدك وهتعرف تتكلم معاه براحتك.
- الـخـزنـة
في الأغلب مبيضحكش وكشري أخرك معاه هتدفع مصاريف الكلية ولو ورقة واحدة ناقصة هيمشورك عليها ومش هيمشيلك ورقك أو حتي نتيجتك غير لما تدفع إللي عليك.
- عـامـل النظـافـة
رويترز الجامعة يعرف دابة النملة لو الدكتور هيتأخر أو مش هيجي أخد أجازة أو في مكتبه من الصبح.. لو صاحبته هتعرف كل حاجة من على أول الباب.
- الـكــافـيـتـيريـا
خد بالك من بتوع كافيهات الجامعة؛ أوًلا لو حكيت أي حاجة قدامهم متعرفش ممكن مين يتكلم ويحور الكلام وينقله من ودن لـ ودن؛ ثانيًا لو ظبطتهم صح وقت ما تكون متأخر على معاد المحاضرة وعايز تفوق على الصبح هتلاقيهم بسرعة بيعملولك النسكافية أو القهوة وصاية و بسرعة البرق.
- المـعـيـديـن
بلاش تحكم من أولها.. نصيحة مجرب أوعي تحكم علي معيدة من كلام طلاب أكبر منك أو من أول محاضرة ليك.استنى شوية حكمك هيتغير وهتلاقيك بتصاحب معيد وبتتجنب التاني..لازم تظبط علاقتك مع المعيدين لإنك هتلجألهم كتيرر وقت الإمتحانات.
- الـعـمـيـد
معلش تعالى على نفسك وإسمع الكلمة بتاعته المعتاده للطلاب الجدد وإللي طبعا وإنت داخل الكلية هتلاقي نفس الكلمة مكتوبة على بوستر متعلق في أول الجامعة.. أه أوعى تخليه يحفظ شكلك على إنك مشاغب ..مش هتعدي منها على خير.
- أُسـر الـطـلـبــة
لو إنت من أحباب الخدمات الطلابية والعمل الإجتماعي التطوعي..يبقي هتسلك مع الناس ديه، الأسر ديه ليها أنشطة فى كل حاجة وفي الأغلب كل أسرة هتعلق بوستر فيها كلمة ترحيبية بالطلاب الجدد ومجموعة من كل أسرة هتوقفك تتكلم معاك وتحاول تجذبك ليهم..فإختار يا تحب يا تنفض.
