8 معلومات خاطئة عن بطارية الموبايل
كتب - محمد عناني
بما إننا شعب طيب «بيحب يفتي بطبعه » دايما بنحب نقدم نصايح للغير، ومن أكتر الحاجات اللي بتلاقي الناس اللي حواليك كلهم اتحولوا لخبراء وبيفتوا فيها لما تيجي تشحن الموبايل، كل واحد بيطلع بنصيحة (متعملش – متسويش – البطارية هتبوظ) وغيره، وفي الأخر يطلع كل كلامهم غلط.
«شبابيك» يرصد أشهر خرافات، ومفاهيم خاطئة، قدمها المصريون، في صورة نصائح وتحذيرات، للحفاظ على بطارية الموبايل..
- الشحن الزيادة هيحرق البطارية
مفيش شخص بيمتلك موبايل مسمعش الجملة، دايما ينصحونا بإن ترك الموبايل على الشاحن فترة طويلة أو نسيانه هيحرق البطارية، للأسف الكلام ده خرافة، لأن البطارية بعد ما بتوصل للشحن 100% عند مستوى محدد وبعديها تقطع الكهرباء أوتوماتيكي، بالمناسبة الكلام ده بينطبق على اللاب توب والتابلت كمان
- لما البطارية تفضى اشحنها
كتير من مستخدمي الموبايلات بينتظروا لما مستوى الشحن يوصل 0% عشان يعيدوا شحنه من جديد، وده تطبيقا لمفهوم خاطيء بأن شحن البطارية وهي لسة مخلصتش نهائيا بيبوظها، الحقيقة الكلام ده برضه مش صح، اشحنوا البطارية في أي وقت، ومعلومة على الماشي (البطارية لما بتوصل 0% بشكل مستمر بتتعرض للتلف).
- البطارية الجديدة لازم تتشحن قبل استخدامها
في عادة قديمة موجودة عن كتير مننا وهي عبارة عن مفهوم خاطيء بيقول إن البطارية الجديدة لازم تتشحن قبل استخدامها، يا جماعة الكلام ده كان زمان، دلوقتي البطارية بتيجي جاهزة على الشغل من غير ما تتحط على الكهرباء.
- متستخدمش الموبايل وهو على الشاحن
كل الخبراء وشركات المحمول أكدوا إن استخدام الموبايل أثناء إعادة شحن البطارية مش بيأثر على أي حاجة، لكن طبعا هو بيستهلك كهرباء عادي لو عايز تشحن بسرعة متستخدمهوش لكن مافيش سبب تاني.
- حط البطارية في التلاجة عشان تطول عمرها
شائع عند ناس كتير جدا أسطورة ملهاش أساس من الصحة، وهي إنك لو حطيت البطارية في التلاجة هتحافظ عليها وعمرها الافتراضي يطول، لا الحقيقة عكس كده خالص، الشركات اللي صنعت البطاريات راعوا كويس إنها تشتغل ويتم حفظها في الجو المعتدل زي الجو اللي بيتعرضله الإنسان، وبكده هتكون الثلاجة سبب موت البطارية.
- الشواحن الصيني هتدمر البطارية
كم مرة صاحبك قالك الشاحن الصيني أو الشاحن ده مش أصلي هيبوظ البطارية، أنا نفسي بقول كده، لكن الحقيق إن الكلام ده خرافة، كل الشواحن بتوصل التيار الكهربائي وبتأدي نفس الغرض، لكم ممكن تختلف بس السرعة في الشحن يعني بدل ما يشحن 100% في ساعة مع الأصلي، ممكن يشحن في ساعة وربع مع التقليد.
- استخدام الإنترنت بيخلص البطارية بسرعة
الحقيقة إن اكتر حاجة بتستهلك البطارية هي الألعاب ومشاهدة الفيديوهات، لكن غير كده تأثير النت على البطارية زي غيره من الاستخدامات الطبيعية.
- عطل واي فاي والبلوتوث وGPS عشان تحافظ على البطارية
الشائع إن استخدام (البلوتوث – GPS - واي فاي) بتأثر على عمر البطارية، الكلام ده مش حقيقي وإلا كانت شركات المحمول ما نزلتش الأوبشنات ديه.
