عمر كمال يكتب: «التيتا في الجامعة»
على السريع كده بكرا يا أصدقاء في الجامعة لو كنتو مستجدين داخلين سنة أولى يبقى أنتو لسة بيور لحمة حمرا زي ما بيقولوا، في حاجات كتير هتواجهوها وعيال تيت هتقابلوها.
نماذج الشباب التيت في الجامعة قد البحر وسمكاته كتير قوي، أه صدقوني، بيبقوا سبقوكم بدفعات، فكل واحد أو واحدة تيتا هيحاولوا يمارسوا أمراضهم النفسية عليكم، ممكن دلوقتي تكون بتقول من جوة نفسيتك (أمراض نفسية وتيت وتيتا.. ده أنت اللى تيت)، لكن أنا هقولك واستفيد من خبرة اللى مش تيت وسبقوك.
بصوا هقولكم على حاجة بتحصل كتير وهتقابلكم، مثلا أول يوم فى الدراسة بيبقى الطلاب المستجدين تايهين حاسين بالغربة، اللى عمال يسأل يمين وشمال هو مبنى كلية حقوق فين؟، وهى: جدول الأداب فين؟، هنا بقى التيتا اللى جواهم هتطلع عليكوا وتظهر وتتفضح.
أكيد دلوقتي بتقول إيه الغلط إني اسأل عن حاجة، هقولك صدقني العيب مش فيك هما اللي تيت، استنوا متزهقوش هقولكم أهوه، لو سؤالكم اتوجه لشخصية تيت هتلاقوا الإجابات سخيفة جداً وممكن تعمل مشكلة.
الواد التيت لما يلاقيك بتقوله «هى كلية الحجوج منين» ده لو أنت صعيدي، وطبعا الصعايدة أجدع ناس، ولو لقى لهجتك من الأقاليم، هتكون إجابته: «أمشى كده طوالي هتلاقي كوبري علوي ما تطلعوش كمل مشي»، طبعا التيت بيستخف، كمان هتلاقيه بيقولك أنت منين يا بلدينا، يا سلام بقى لو قولته من المنصورة هيقولك جوزنى (تيييييييت) حط بين القوسين أى كلمة تيجي في بالك، لأن الناس بيختلف مستوى تربيتهم، ولا لو قولتله من المنوفية ييييييه هتسمع كلام كتير، وفكك من بتوع كفرتوا الشيخ يعني ده لو أنت قولت إنك من كفر الشيخ، صحيح ممكن ترد عليه وتقوله هو اللي كان إيمانه ضعيف، بس كبر دماغك من الناس ديه أنت جاي عشان هدف عظيم جدا هو انك تذاكر وتنجح في سنة أولى، عشان تقابل المستجدين السنة الجاية تتيت عليهم هههه.
خدى عندك بقى لو رحتى تسألى وتقولى هو جدول الأداب فين، هتلاقي واحد خفة مستني المستجدات عشان عايز يظبط بقى أصله تيت، ممكن مثلا يرد عليكي يقولك جدول الأداب في القسم، طبعا حضرتك بريئة هتقوليله إيه؟، هيحاول يضحك عليكي ويقولك أنا ممكن أساعدك واجيبهولك، هيحصل ويجيبه، بعديها بقى هيطلب رقم موبايلك ويحفظ رقمك باسم (س أداب) أوعى يضحك عليكي.
طبعا الجامعة فيها ناس كويسين هما الغالبية، أنا بنبهكم لنوعيات تيت هتقابلوها، أوعى تقفش وتتخانق من أول احتكاك صدقني هتقابل كتير جدا، وانت أوعى تديله رقمك..
عام دراسي سعيد
