رئيس التحرير أحمد متولي
 البنات في الجامعة أشكال وألوان.. انتي مين فيهم؟

البنات في الجامعة أشكال وألوان.. انتي مين فيهم؟

بتدخل الجامعة أول يوم كأنك داخل مول العرب مثلا، يعني بتلاقي أشكال وألوان من الشباب والبنات وتحديدا البنات اللي بتشوف منهم العجب بجد، تخليك عمال تلف يمين وشمال وتستعجب وتقول "سبحان الله في خلقه يا أخي!"

تعالى اعرف كام نوع من بنات الجامعة على السريع كده:

  • الفاشونيستا

دي بقى ايقونة الموضة والفاشون في الجامعة، يعني البنت اللي بتلبس حاجات غريبة وعجيبة جدا، بنطلون جينز مقطع بفصوص كتير بتلمع وبادي أسود قصير، وشعرها مفرود ومكياج العالم كله في وشها، وممكن كمان تكون محجبة ودي بقى هتلاقيها بتلبس "التوربن" بدل الحجاب مع نضارة شمس كبيرة، النوع ده يحسسك كأنك في شرم الشيخ مش الجامعة خالص، والبنات والولاد عينهم عليها في الرايحة والجاية وشوية ضحك وتريقة بقى.

  • الدحيحة

البنت دي لسه عايشة باستايل ثانوي، ومقدرتش تتخلص منه لحد دلوقت، تلاقيها بتلف الجامعة كلها تدور على "سكشن" فاضي تقعد تذاكر فيه وتدح شوية، ولما تخلص تطلع على المكتبة تقرأ وغالبا بتكون بتقرأ روايات ومسرحيات وغيره، وأصحابها قليلين جدا أو مش موجودين أصلا.

  • الليدر

البنت الريسة من الاخر، اللي أول ما تسمع أن الدكتور عمل كتاب جديد تنط بسرعة في الموضوع وتجمع فلوس الكتاب من الدفعة، وهي أول واحدة بتعرف أن المحاضرة اتلغت، هي اللي بتيجي تقف قدام المدرجات وتخبط بإيدها وتقول :" ياجماعة..اسمعوني هنا..الدكتور جاي بس هيتأخر شوية وبيقولكو محدش يمشي"، البنت دي طبعا حواليها شلتها اللي حاسين بشخصيتها ومحسسينها بكده أوي، وبتاخد شوية تريقة ودعوات من الدفعة كلها

  • المسترجلة

دي البنت بتاعة "كفك ياعم!" اللي بتلاقيها دايما بين شلة الولاد، وضحك وهزار بالإيد والضرب والزق، لبسها غالبا بيكون قالب على لبس الولاد حتى كلامها، لكن بتلاقيها جدعة جدا وطيبة كمان، والمعاكسات ما بينهم والكلام الحلو مش معناه حب خالص لكن هزار وترويش كده.

  • الكيوت

ممكن تسمع صوت دبة النملة ولا أنك تسمع صوتها أبدا، لأنها الهادية الكيوت الغلبانة اللي بتقعد على جنب جدا، وترد لو حد كلمها بس لكن تتكلم هي وتبدأ حوار وتصاحب ناس مستحيل! وكمان بتروح من الجامعة بدري بعد المحاضرات على طول، مفيش وقت للتمشية والقعدة مع أصحابها والكلام الفاضي ده، يعني من الاخر لا ليها في كلام مع الولاد ولا حتى البنات، وممكن تتخرج وتتفاجئ بعد كده أنها كانت معاك في نفس الدفعة وماشوفتهاش.

  • المتدينة

عادة البنت دي بتكون لابسة واسع وفضفاض وإيشارب طويل وعريض، وأي كلام هيدور بينك وبينها هتجره بسرعة ناحية الدين وتجيبلك احاديث وأيات قراءن طول الوقت حتى لو بتتكلمو في ماتش الأهلي والزمالك مثلا، لو جيت تدور عليها هتلاقيها في مكان من الاتنين يا إما في "السكشن" أو في المسجد، وتلاقي في شنطتها دايما كتاب "الرحيق المختوم" أو غيره يعني.

بص من الاخر كده سيبك من كل البنات دي وركز في مذاكرتك بلا دوشة!

ياسمين الصاوي

ياسمين الصاوي

مترجمة صحفية مهتمة بالتكنولوجيا والقضايا المجتمعية