فيديو وصور| في مصر فقط «الثورة ضاحكة»
لو لفيت العالم كله مش هتلاقي زي خفة دم الشعب المصري «بيعيط ويضحك» في نفس اللحظة، وعبقريته في أنه بيحول المواقف الجادة لسيل من الإفيهات يشهد له عليها التاريخ، وليه نروح بعيد والنهاردة الذكرى الخامسة لثورة 25 يناير.
اليوم ده مينفعش المصريين ينسوه من حياتهم. الغضب والاحتقان كان ميسطر على معظم الموجودين في الميدان، وزي ما إحنا عارفين طبع المصريين مكنش ينفع اليوم يعدي من غير بصمة خاصة «مكتوبة ومرئية» تتناسب مع سرعة بديهة لا يُستهان بها.
لافتات المتظاهرين حملت قدرًا كبيرًا من السخرية المبكية؛ مثل هذا الشاب الذي حمل لافتة مكتوب عليها عبارة: «ارحل مراتي وحشتني.. متزوج منذ 20 يوم»، و«ارحل عاوز اتجوز».
بينما كتبت أخرى: «اللهم أرفع عنا البلاء والغلاء وأبو علاء» مشيرة إلى الرئيس الأسبق حسني مبارك، و«باي مبارك موبايلات بقى»، و«ربع قرن وخمسة عليه هتعمل تاني فينا إيه».
أما اللافتة الأكثر فكاهة فكُتب عليها: «لو ما استحمتشي النهارده في بيتنا هستحمى يوم الجمعة في قصر الرئاسة»، وآخر: «ده لو كان عفريت كان طلع».
وفي تقليد الكاميرا الخفية كتب مواطن: «ارجع يا ريس كنا بنهزر معاك»، وأخرى: «أعلن التليفزيون المصري أن مبارك شارك في غزوة أحد».
