متعملش البرد حجة ويلا نقضي أجازة سعيدة
«الإجازة جت وهتخلص ومش هنعرف نستمتع بيها» الجملة دي بقينا بنسمعها كتير الفترة اللي فاتت من غير ما نفكر إننا ممكن نكون إحنا السبب في ضياع الإجازة وعدم الاستمتاع بها.
صحيح في نسبة كبيرة بتكون الظروف هي اللي بتتحكم في تصرفاتهم بس الإرادة اتخلقت جوانا علشان نعمل اللي بنحبه واللي يخلينا نشحن طاقة إيجابية تاني علشان نرجع للدراسة في قمة النشاط.
«شبابيك» قررت إنها تعرفكوا الطريق الصح علشان تقضوا إجازة سعيدة من غير ما نتحجج بالبرد أو بالظروف اللي بتشحنا طاقة سلبية.
ربنا خلق كل حاجه فينا لمهمة معينة وزي ما البشر بتتعب من الضغوط، العقل البشري كمان محتاج لراحة، علشان كده الطب النفسي وجهنا بنصائح لو أي حد مننا استغلها صح هيخرج من إجازته مبسوط وهي كالآتي:
- ارتاح واسترخي، وضبط نظام نومك بشكل طبيعي لتعويض الإرهاق العصبي والذهني الذي مررت به أثناء فترة الامتحانات.
- الترفيه، مثل الذهاب إلى السينما لمشاهدة أحدث الأفلام أو الذهاب إلى المسرح.
- نظم رحلات اليوم الواحد مع الأصدقاء كنوع من أنواع تغيير الجو والترفيه.
- مارس هوايات مفضلة سواء القراءة أو الرسم أو غيرها من الهوايات التي تساعدك علي تنمية شخصيتك.
- شارك في أنشطة خلال إجازة نصف العام لتنمية المهارات.
- وأخيرًا لابد من إلقاء نظرة سريعة علي منهج الفصل الدراسي الثاني حتى تكون فكرة عامة على ما سوف تدرسه.
وزي ما عرضنا وجهة نظر الطب، قررنا كمان نعرفكم خطط أصحابكم وزملائكم في الإجازة:
ندى عصام قررت إنها تقسم يومها بين ساعات كافية للنوم ومشاهدة التليفزيون، بالإضافة لبدء كورس إنجليزي، أما سارة عادل فحب التنمية البشرية كان مسيطر عليها وقررت تحضر تتابع محاضرتها علشان متفوتش واحدة، مع مراجعة أجزاء من حفظ القرآن.
وبالنسبة للخطط اللي مفيهش كورسات، قالت إسراء ناصر إن حبها للمطبخ هيخليها تركز على برامج الأكلات، بجانب مقابلة أصداقائها وأقاربها.
أحمد جمال كان ليه خطة مختلفة بما أنه بيحب الكتابة، قرر أنه يطور أسلوبه في الكتابة بجانب دراسة مستوى آخر من اللغة الإنجليزية، أما ترنيم محمد فتمنت قضاء وقت ممتع في أي مكان خارج البلاد وفي حالة عدم تحقيق الأمر يكون المنزل هو الجليس لمشاهدة التلفزيون والنوم والدراسة «أون لاين».
وعن خطة يوسف وحيد، فقرر تقسيم اليوم بين ساعات للنوم وأخرى للسينما و«الجيم» مع تحديد ساعتين في اليوم للإطلاع على المنهج الجديد؛ استعدادًا للفصل القادم.
أما أميرة إبراهيم، فالإجازة بالنسبة ليها عبارة عن طقوس: أول ما تصحى تأخد فطارها، وبما إن الموسيقى هي حياتها فلازم وقت ليها بحيث تقدر بعدها إنها تروح «الجيم» أو تنزل تتمشى مع شخص مقرب ليها سواء من العيلة أو الأصدقاء.
