ذكرى رحيل أحمد رمزي.. ما لا تعرفه عن «الولد الشقي»
زي النهاردة 28 سبتمبر، رحل عننا الشاب الشقي أحمد رمزي اللي من أول ما ظهر على الشاشة وهو ليه طلة وجاذبية خاصة وده خلاه يعلق في أذهان جمهور كتير لغاية ما بقى ليه شعبية كبيرة وكسب حب الناس ليه وبقوا يستنوا ظهوره على الشاشة بفارغ الصبر.
"رمزي" هو ابن للدكتور محمود بيومي وأم اسكتلندية هي هيلين مكاي وأخوه هو الفنان الكوميدي سيف الله مختار الشهير بجملة "انتوا يا بتوع البنزيمة" في فيلم بنزينة الأنس.
التمثيل
أحمد رمزي كان بيحب التمثيل جداً وكان نفسه يدخل مجال السينما وصداقته بالنجم عمر الشريف اللي كان بيحب السينما برده كبرت الفكرة عنده أكتر وخلته متمسك بحلمه وفعلاً بقى واحد من نجوم السينما تعالوا أقولكوا إزاي :)
في يوم كان "رمزي" قاعد في نادي البلياردو زي ما كان متعود ولمحه المخرج حلمي حليم وكان معجب بتعبيراته وطريقته وعرض عليه انه يمثل في أول بطولة ليه في فيلم أيامنا الحلوة سنة 1954مع صديقه عمر الشريف والوجه الجديد عبد الحليم حافظ وديه كانت بداية انطلاقة رمزي في عالم النجومية.
عمر الشريف
صداقة أحمد رمزي مع عمر الشريف هي العمر كله :) عاشوا مع بعض طفولتهم وشبابهم ونضجهم وجمعهم حب السينما اللي وصلهم انهم يصبحوا نجوم شاشة السينما المصرية على مر العصور وعملوا أفلام علامات زي فيلم أيامنا الحلوة و صراع في الميناء وكمان مسلسل حنان وحنين.
أعمال رمزي
رمزي عمل أكتر من 100 فيلم سينمائي "صراع في الميناء" و"صراع في الوادي" و"ابن حميدو" و"أيام وليالي" و"علموني الحب" و"أين عمري" وكمان شارك في مسلسلات زي "وجه القمر" و"حنان وحنين".
معلومات متعرفهاش
من حوار أحمد رمزي مع المذيعة ليلى رستم الولد الشقي قال حاجات كتير أول مرة أعرفها ولعتقد إن بعضكوا مش عارفها فتعالوا نتعرف عليها سوا :)
- رمزي كان بيلبس سلسلة بخرزة زرقة بناءأً على طلب زوجته لأنها كانت بتخاف عليه.
- أول أجر ليه كان 40 جنيه.
- أول مرة يمثل فيها مسرح كان عنده 16 سنة وكان طالع بدور امرأة خادمة في مسرحية لبرنارد شو.
- رمزي دخل كلية طب وقعد فيها 3 سنين وبعد كدة دخل كلية تجارة وفي أخر سنة ليه كان المخرج حلمي حليم دخله في محال السينما.
- أول مشهد ليه في حياته كان مع زينات صدقي لما كان بيقولها والنبي يا ست زنوبة خدي تبتيلي على الزرار ده وده في فيلم أيامنا الحلوة.
- دوره في فيلم أيامنا الحلوة كان بيعبر عن شخصيته في الحقيقة.
- رشدي أباظة كان من أصدقائه المقربين جداً.
- رمزي كان بيحب اللاعب صالح سليم جداً وبيعتبره أحسن لاعب.
