إزاي تعدي مرحلة ما بعد الانفصال كأن محصلش حاجة
مرحلة ما بعد الانفصال بتكون من أصعب المراحل على البنت والولد، مش شرط يكون حد فيهم غلطان في حق التاني، ممكن يكون ببساطة الإتنين مش مناسبين لبعض.
دي نصايح خبراء علم النفس في موقع Psycholohytoday وخلاصة خبرات كتير من البنات حكو لـ«شبابيك» عن التجربة وإزاي عدوا المرحلة دي، عشان تقدري تستفيدي وتعدي المرحلة دي بسلام.
تقبلي الواقع
متحاوليش تباني قوية وتتجنبي التفكير في المشكلة، بالعكس إدي نفسك مساحة التعبير عن الألم، لأنه مهما الفترة دي طولت فهي مش هتستمر العمر كله. عالجي المشكلة واستفيدي من التجربة واتعلمي من الأخطاء، لكن متتجاهليهاش عشان بالطريقة دي المشكلة هتزيد مش هتتحل.
متضيعيش وقت كتير في استرجاع الماضي، عشان دا انتهى خلاص، وطالما قررتوا تنفصلوا، يبقى تتقبلي الواقع وتتعاملي معاه، وتستوعبي الوضع الجديد.
استعيني بأهلك وصحابك
اطلبي مساعدة حد قريب منك من أهلك يكون متفهم وبتستريحيله، أو اختاري صديقة أو إتنين يكونوا قريبين منك وتقدري تتكلمي براحتك معاهم، وتحكيلهم أفكارك ومشاعرك.
اشغلي نفسك بحاجات بتحبيها
حاولي دايما تشغلي نفسك بأنك تعملي أي حاجة، سواء دراسة أو شغل، أو هواية بتحبيها زي الرسم أو الكتابة أو الأشغال اليدوية، بس متقعديش فاضية أبدا لأن الفراغ هيخليكي تعيدي التفكير في الموضوع.
متدخليش في علاقة تانية لمجرد نسيان العلاقة اللي قبلها
بنات كتير بتقع في الغلطة دي، عشان تنسي نفسها الشخص الأولاني، فتدخل في علاقة تانية، والعلاقة دي مش بيبقى مهم فيها صفات الشخص التاني أوي، هو مجرد وسيلة تنسيها الشخص الأولاني، وكتير من العلاقات بتفشل بسبب أن هدف البنت كان أنها تلاقي أي حد تاني وخلاص.
متسمعيش أغاني عاطفية وأفلام حزينة
مفيش أكتر من أغاني الحب والفراق والغيرة، حاولي تتجنبي الاغاني دي تماما في فترة ما بعد الانفصال، ممكن تسمعي أغاني أو مزيكا مختلفة حسب أنتي بتحبي إيه بس ابعدي تماما عن أي أغاني حزينة، عشان تأثيرها هيبقى سيء جدا.
ابعدي تماما عن أي حاجة كانت مشتركة بينكوا
طالما الشخص دا مبقاش في حياتك، متضيعيش وقتك وتدمري نفسيتك بأنك كل شويا تبصي على صوركوا، أو تبصي على «الفيس» بتاعه والرسايل اللي كانت بينكو، ولازم تبطلي العادة السيئة دي، لأنها مش هتفيدك بحاجة غير أنها تفكرك بالذكريات.
لو كان في أماكن بتروحوها مع بعض، حاولي متروحيهاش لوحدك، وفي نفس الوقت جربي أماكن جديدة مع ناس جديدة.
فكري في نفسك أكتر
الفترة دي هي أحسن فترة تبتدي فيها تفكري في نفسك وتهتمي بيها وتبدأي ترتبي أفكارك، وتعيدي حساباتك.
اتعلمي
اتعلمي حاجات جديدة، واقرأي في الموضوعات اللي بتحبيها، الحياة مليانة حاجات أنتي متعرفيش عنها حاجة، وكل ما تعرفي أكتر عن موضوعات جديدة وثقافات جديدة، دا هيخليكي تحسي أد إيه مشكلتك دي صغيرة وأنها متستاهلش أنك توقفي حياتك عليها.
المصادر
(1) (2) http://shbabbek.com/SH-29894 http://shbabbek.com/SH-6314
