علاء صلاح الرفاعي يكتب: السكة سالكة
ما اختارتش اسمي
بس اختارت احلامي
سخر لي ربي الكون
والسكة أدامي
سالكة رغم الظروف
سالكة رغم الفتن
من حزن وضيق
ف خوف من بكرة والزمن
سالكة والله سالكة
لو عيني شافتها سالكة
لا حِكَم تعجبني أقولها
أو انصح بيها غيري
ووقت حاجتها اتوه
وتسهيني المحن
يرزقني ربي أفرح
واصرخ السكة سالكة
يمنع عني لحكمة
أغضب واعملي أزمة
واشكي همي لفاني
فاكر هيحلالي
يرزقني ربي تاني
أفرح بعطاؤه وانسى
وما بين منع وعطاء
قلبي أناني غافل
ناكر فضل الرحيم
ومركز ع النوازل
عايز ينجح براحته
من غير تعب يجاهده
بعزيمة المقاتل
من غير حقود يغير
يتمنى يشوفني محني
أو أخ ما فيه خير
يلقى هناه ف وجيعتي
أو صاحب كنت فاكره
طيَب جرحي ف حبايبي
لكنه سابني انزف
ووقف ف صف خصمي
فلقيت ده كتير عليا
فدعيت ربي بقوة
إنجد عبدك يا سندي
واكفيني شر خلقك
نجيني بقيت لوحدي
وفي لحظة صدق خالصة
حقق لي ربي أملي
فقولت السكة سالكة
لكن قولتي النوبة دي
كانت بنفس صافية
وقلب ماليه رضا
بنصيبي في كل ثانية
منحة محنة يا دنيا
قابلك على كل حال
آسف كان فهمي قاصر
ونسيت.. إنتي إختبار
مش سهل لكنه كاشف
ولعيني الإختيار
يا اشوفك سودا عتمة
طول ما الأنفاس بتسري
يا اشوفك سكة سالكة
وربي يقوي عزمي
∼∼∼∼∼∼∼∼∼∼
هذا المقال ضمن مسابقة «شبابيك» للكتاب الشباب.. تعرف على تفاصيل المسابقة وشروط كتابة المقالات عبر «شبابيك» من خلال الرابط التالي: http://shbabbek.com/SH-43132 http://shbabbek.com/SH-43132
