دليلك لتخطي مرحلة الانفصال.. (للرجال)

لو حظك وحش وانفصلت قريب يبقى جيت في وقتك، احنا هنا هنقولك إزاي تعدي المرحلة دي من حياتك. في الموضوع دا خلاصة نصائح متخصصين العلاقات على موقع Primer وتجارب شباب حكو لـ«شبابيك» إزاي عدوا مرحلة الانفصال.

الابحاث بتقول إن مرحلة الانفصال زي ما بتكون صعبة على البنت، فهي أصعب كمان على الولد. البنات بعد الانفصال مباشرة بتكون مدركة للواقع وإن الانفصال حصل، وبتكون متأثرة جدا في البداية وتبدأ حالتها تتحسن بالوقت.

العكس بقى هو اللي بيحصل مع الولاد، في بداية الانفصال مش بيكون مدرك وبيقضي حياته عادي خالص، بس بعد فترة قصيرة بيدأ يدرك اللي حصل، ويبدأ يحس إن في حاجة ناقصة وحالته تسوء. وعلشان تعدي المرحلة دي في أمان اتبع النصايح دي:

قضي وقت أكتر مع صحابك

الصحاب في الفترة دي حاجة مهمة جدا، لأنهم هيساعدوك تغير مودك بحكاويهم وتفاصيلهم، قرب من صحابك اللي كنت بعدت عنهم واحكيلهم المشكلة واطلب منهم يساعدوك.

وعبدالرحمن، 23 سنة، بيقولك إن «القعدة على القهوة مع صحابك من أكتر الحاجات اللي ممكن تساعد الولد يتخطى مرحلة الانفصال».

استمتع بكونك سينجل

الارتباط زي ما فيه حاجات جميلة، هو مسؤولية على البنت والولد، ومسؤولية أكتر على الولد، وممكن تبص لانفصالكو كمسؤولية اتشالت من عليك، وتوجه تفكيرك كله لشغلك ومستقبلك.

متحاولش تتواصل معاها

​​​​​​​ تجنب التواصل معاها تماما، حتى لو كنتوا قبل كدا أصدقاء، ما تتضحكش على نفسك وتقول إن هيفضل بينكم علاقة صداقة، لأن دي حاجة مدمرة ليكوا أنتوا الاتنين، الأفضل أنك تبعد تماما، وتتجنب أي حاجة كانت بتربطكوا ببعض. لو بينكو أصدقاء مشتركين حاول تتجنبهم في الفترة دي، لحد ما المرحلة تعدي وفهمهم أنك مش بتتجنبهم لشخصهم وإنما لمشكلة خاصة بيك أنت.

استغل طاقة الغضب

في الفترة دي بيكون جواك طاقة غضب كبيرة، ممكن تستغلها بأنك تنزل جيم أو تلعب رياضة في البيت أو في النادي، أو تخصص وقت للجري أو المشي، دا هيساعدك تفرغ طاقتك وكمان هيساعدك تقوي نفسك جسديا وترجع ثقتك بنفسك.

ابعد عن الكيف

في الفترة دي ممكن تفكر أن المخدرات أو السجاير هيساعدوك، لكن الحقيقة أنها هتضرك خاصة في الفترة دي، لأنك محتاج في الفترة دي تركز في إزاي تتخطى المرحلة الصعبة دي، مش تلغي تفكيرك تماما. تجنب الدخول في علاقة تانية "عبدالغني، 24 سنة، بيقولك إن «الدخول في علاقة مع بنت جديدة لمجرد نسيان العلاقة اللي فاتت، شيء خطير جدا، ومن أسوأ الحاجات الي ممكن تعملها، لأنها هتكون علاقة محكوم عليها بالفشل». ممكن تلجأ لصديقاتك البنات وتطلب منهم المساعدة، لكن متورطش نفسك في علاقة هتظلم فيها نفسك والطرف التاني كمان.