عايز تعرف أنواع المنح الدراسية والفروق بينها.. ادخل هنا
لو بتدور على منحة في مجال دراسي معين، وبتلاقي منح كتير بس مش عارف أيه أكتر حاجة مناسبة ليك وأيه الفروق بين كلمات زي internship وscholarship وfellowship.. «شبابيك» هتقولك الفرق بينهم عشان تعرف تختار الاختيار المناسب.
أولاً .. scholarship:
هي منح مالية مقدمة للطلبة قبل مرحلة الدكتوراة، ومتلقي المنحة مش مطلوب منه يرد مبلغ المنحة، لكن أحيانا في منح بتشترط حاجات زي إن متلقي المنحة يرجع لبلده بعد انقضاء فترة المنحة عشان يساعد مجتمعه بعلمه وخبرته والمصطلح دا بيستخدم في دول أوروبا بالتبادل مع مصطلح fellowship لأنهم مصطلحين قريبين من بعض.
أنواعها:
- منح جزئية Partially funded scholarship: ودي بتغطي نسبة معينة من تكاليف الدراسة مش التكاليف كلها.
- منح ممولة بالكامل fully funded scholarship: دي بتغطي كل التكاليف، تذاكر السفر والإقامة والمصاريف الشخصية ومصاريف الدراسة كمان.
ثانياً.. fellowship:
ودي منحة دون مقابل، وعشان تحصل عليها لازم تكون متميز جدا جدا في مجال دراستك، وليك تاريخ دراسي وعملي طويل، وبتبقى في مجالات كتير أشهرها الهندسة والطب.
ثالثاً.. internship:
دي بتكون للطالب أو الخريج اللي عايز ياخد خبرة في مجال معين، وبتكون مناسبة أكتر للطلبة عشان يكون خبرات تفيده في أنه يلاقي شغل بعد التخرج، وبتكون عبارة عن تدريب في المجال دا، وليها أشكال كتير :
- ممكن تكون من غير مقابل، يعني أنت هتتدرب وتاخد خبرة لكن مفيش مقابل مادي.
- ممكن تكون ممولة، يعني صاحب العمل هيدفع مقابل مادي للمتدرب.
رابعاً.. Assistantship
دي منحة و وظيفة في نفس الوقت، وهي أقرب للوظيفة منها للمنحة، لأن الحاصل عليها بيتطلب منه في الخارج أنه يقوم بنشاط ما خلال الفترة اللي بتغطيها المنحة، زي التدريس أو العمل في أي مجال يختاره.
في منها أنواع كتير زي منحة التدريس teaching assistantship: ودي عبارة عن أنك هتاخد منحة للدراسة وفي مقابلها بتدرس لغة أو أي مادة أنت متخصص فيها.
أو research assistantship: وفيها بتحصل على منحة وفي المقابل بتقوم بإجراء أبحاث مرتبطة بمشروع أو مجال معين، وغالبا بيكون مرتبط بمجال دراستك الي المنحة بتموله.
خامساً.. studentship
المصطلح دا نادر شوية وبيستخدم في بريطانيا بس تقريبا، وبتبقى الجامعات عندها مكان فاضي في معمل معين أو كلية معينة، والطالب في الحالة دي بيتحمل تكاليفه، لأنها مش بتشمل الإقامة والسفر والمصاريف الشخصية.
