صور| الموضة بره حمادة وعندنا حمادة بالجنزبيل
كل يوم بنشوف بنات كتير في الشارع والمترو والمواصلات والمطاعم بس عينك ما تشوف إلا النور، تلاقي الفستان جميل وألوانه حلوة وممكن كمان تلاقيه صناعة تركي ولا هندي ولا غيره، ولو شوفته على بنت أجنبية تلاقيه تحفة، لكن من غير"التاتش" المصري ما يسواش!
البادي والبنطلون
من الأخر كده البنت المصرية الأصيلة لازم تغير كل ملامح الفستان تماما، البسي البادي الكارينا اللي يجنن، واستقبلي بقى ريحة العرق، وبنطلون استرتش ملزوق أو جينز اسكيني"قمع" بمعنى أصح، وطبعا كذا إيشارب ملفوفين هدية، والورد والشراشيب وحاجات كتير اوي في راسها، يعني فستان تركي تحول لمصري ببساطة من غير ما تغير تيكت ولا غيره، طب ما بدل ما البنت تلبس مليون حاجة فوق بعض، ما تلبس فستان واحد شيك وواسع وبكم طويل كمان، وتلف الايشارب بطريقة بسيطة جدا، زي كده البنات التركيين ولا السوريين، هو فستان واحد محتشم وطرحة واحدة بس، دي البساطة شياكة!
الحلة في الرأس
المهم أن الاستايل ده أساسي حتى في الأفراح والمناسبات، تلاقي الفستان شيك ومليان فصوص بتلمع وتبرق، والبادي قاعد تحتيه، وياسلام بقى لما يبقى من نفس لون الفستان كمان، يعني فستان فرح أبيض يبقى البادي أبيض وش، وكأنه كده بقى حتة من الفستان مثلا، وإيشارب على شكل "حلة" في رأسها مع شوية شعر أصفر حلوين طالعين كده، وتلاقي فصوص في الإيشارب أو طوق ورد أو فيونكة أوفرنشونة على الجنب وشوية حاجات تحتار في تفسيرها، واسمع بقى "ما شاء الله...ايه الجمال ده! قمر ربنا يبعد عنك العين".
لو هنقول أن دي حشمة ولازم فستان الفرح يبقى بكم، وتلبس ايشارب كمان، طب ايه المشكلة؟ ما تلبس بكم وايشارب بس بطريقة تانية، شوفت فستان الأميرة "كيت ميدلتون" زوجة الأمير "تشارلز" في فرحها، الفستان كان بكم طويل برده ومحتشم، ولو بنت عندنا لبسته ولبست عليه ايشارب بسيط كان هيبقى حلو كمان، لكن مش حلو خالص فكرة البادي في كل حاجة كده، والايشارب كل ما كان بسيط كل ما كان أحلى بكتير وأشيك.
في الفاترينة والشاشة
الغريب أن المحلات أمنت بالاستايل ده وبقت تعلقه في "الفاترينة"، يعني تشوف "المنيكان" واقفة ولابسة فستان وبادي وبنطلون وإيشارب وكأنها بتنافس البنات في الشارع مثلا، والمذيعات المحجبات بقو يلبسو الاستايل المصري ده في التلفزيون كده على الملأ، بعد ما كانت المذيعة هي مثال الجمال والشياكة وما ينفعش تظهر على التلفزيون إلا في أحسن صورة، ولبسها الناس تقلده، فبدل ما تظهر المذيعة بلبس محتشم وبسيط وشيك، وتلبس حاجة واحدة بس مش مليون حاجة، لا دي بتلبس زي الناس وخلاص، ومش مشكلة الأناقة والجمال والبساطة بقى!
الفكرة مش فكرة ايشارب أو حشمة خالص، الفكرة ازاي تعرفي تلبسي بسيط ومحتشم وبشياكة برضه، يعني تخيلي لو ركبتي المترو النهارده أو مشيتي في الشارع لقيتي كل البنات لابسة فستان طويل وواسع ولونه هادي وايشارب واحد ناعم وملفوف ببساطة جدا من غير أي تكلف، مش هتحسي أن شكلهم جميل وشيك جدا، بصي من الاخر مهما شوفتي في المحلات فساتين أو بلوزات عجبتك ما تختاريش غير اللي يناسبك ويكون محتشم وشيك بجد، مش فستان تركي أو هندي وخلاص.
