خروجات الفلانتين.. حفلات رومانسية وباليه وعروض هتبسطك
الفلانتين يوم مميز للفسح والخروجات، سواء كنت مرتبط أو سينجل، فاليوم ده بيكون مليان حفلات وعروض سينمائية مميزة، مينفعش تتفوت. من أول الموسيقى الرومانسية وعروض الباليه، لحد الحفلات الشرقية. وكمان الأسعار بتكون مناسبة للجميع.
لو بتفكر تخرج ومش عارف فين، أو عايز تغير جو الدباديب والكافيهات، «شابيك» بتقدم لك في التقرير ده معظم الحفلات اللي هتكون موجودة يوم الفلانيتن.
محمد محسن
لو عايز تقضي اليوم ده بطريقة مختلفة، ايه رأيك في الجو الشرقي؟ محمد محسن بيعتبر أبرز من قدم روائع سيد درويش ومحمد عبدالوهاب، بشكل متجدد ومتميز. وعشان كده هتستمتعوا لما تسمعوه الساعة 7 بيحتفل معاكم بعيد الحب على مسرح النهر بساقية الصاوي.
سعر التذاكر للجلوس 70 جنيها وللوقوف 50 جنيها.
حفل أوركسترا عمر خيرت
لو كنت من محبي الموسيقار عمر خيرت؛ فالحفل الخاص به هيكون الساعة 8 مساء على المسرح الكبير بدار الأوبرا المصرية.
أسعار التذاكر 300 جنيه- 250 جنيها - 150 جنيها.
كلثوميات
«سيرة الحب»، «حيرت قلبي»، «رق الحبيب»، «أمل حياتي»، «ألف ليلة وليلة» وغيرها من أغاني الست اللي سلطنت العالم كله. وأنت كمان لو عايز تتسلطن اليوم ده، يبقى عليك وعلى حفلة «كلثوميات» بمعهد الموسيقى العربية، في الساعة 8 مساء.
سعر التذكرة 50 جنيها.
مسار إجباري
«مسار إجباري» يعني الروقان والموسيقى المختلفة والراقية اللي هتخلي اليوم له طابع مختلف. الحفلة مجانية وهتكون في القرية الذكية من الساعة 12 الضهر حتى 8 مساء.
الفيلم الفرنسي «Dheepan»
أما بقى لو عايز تشوف فيلم متميز يبقى اتفرج على «Dheepan» في سينما «زاوية». الفيلم حاصل على جائزة السعفة الذهبية في مهرجان كان السينمائي 2015. وهو فيلم دراما وجريمة تم إنتاجه في فرنسا.
وبيدور الفيلم حول «ديبان» محارب تاميلي في سيريلانكا، واللي بيسافر لباريس مع امرأة وفتاة شابة وبيتظاهروا أنهم عائلة عشان يحصلوا على اللجوء السياسي.
عرض الفيلم هيكون في حفلات الساعة 1 ظهرا و3 و5 عصرا
فيلم «السلام عليك يا مريم»
وفي نفس اليوم في «زاوية» فيه حفلتين الساعة 7 ونصف و10 مساء لفيلم «السلام عليك يا مريم» وفيلم «ذيب» ودول من الأفلام العربية المرشحة للأوسكار السنة دي. وفيلم «السلام عليك يا مريم» بتدور قصته حول نمط الحياة الصامت اللي بتعيش فيه 5 راهبات في دير منعزل في الضفة الغربية. والفيلم من تمثيل هدى الإمام، وماريا زريق. ومن تأليف وإخراج باسل خليل.
فيلم «THEEB»
الفيلم بتدور أحداثه حول قصة الفتى البدوي وأخوه حسين، اللي بيسيبوا قبيلتهم وبيواجهوا رحلة مليانة بالمخاطر في مطلع الثورة العربية الكبرى. والفيلم بيدور في إطار مغامرة درامية في الصحراء العربية عام 1916، خلال فترة الخلافة العثمانية، ومع اندلاع الحرب العالمية الأولى.
وهو من بطولة جاسر عيد، وحسن مطلق. والفيلم من تأليف باسل غندور، وناجي أبو نوار، وإخراج ناجي أبو نوار.
«حب للأبد» بدار الأوبرا
أما لو عايز تحضر حفل رومانسي على أنغام الموسيقى الغربية، فدار الأوبرا بتقدم لك حفل «حب للأبد» بمسرح الجمهورية في الساعة الثامنة مساء. والحفل هيكون مزيج بين مجموعة من الأغاني النابولتية اللي بتجسد الرومانسية ومعاني الحب السامية، وعروض بالية لفرقة بالية أوبرا القاهرة.
أسعار التذاكر: 10 جنيهات و 15 جنيها و25 جنيها
«أوركسترا القاهرة السينفوني» بالأسكندرية
