بأقل من 200 جنيه.. اشتري ليها شنطة وشال بدوي
البنات كلها بتحب تكون مميزة في شكلها وستايل لبسها، ويسلام لو بتلبس حاجة محدش لابسها غيرها. ولأن حبيبتك هي أكتر شخص مميز بالنسبة لك، لازم في يوم عيد الحب «الفلانتين» تحسسها بكدة.
«شابيك» تجول في منطقة الحسين، ولقينا محل «علاء» لشغل الهاند ميد، اللي بيقدم الشنط الجدل والشالات، على الستايل المصري. ولما نقول ستايل مصري في اللبس، يعني أكيد شيء مميز، لكن لو قولنا كمان أنه ممزوج بستايل بدوي.. هتكون النتيجة إيه؟
في السطور الجاية هتتفرج معانا على مجموعة من الشنط والشالات البدوية، والبعيد عن استغلال المحلات في الفلانتين، فأسعارها بتبدأ من 130 جنيها.
شنط على الطراز البدوي
الشنط بقيت شيء أساسي بيكمل ستايل اللبس والمظهر الشيك. عشان كدا المحلات بقيت تتنافس وتتفنن في أشكالها وألوانها، فمرة تطلع موضة الشنط الفوسفوري، ومرة الكروس ومرة الشنط الباك. ورغم الختلاف ده كله إلا أنك لو بصيت على كل البنات هتلاقيهم كلهم لابسين شنط شبه بعضها.
لكن اللي بيميز الشنط دي عن غيرها هو أنها بتجمع بين الاستايل المصري والبدوي، فتحس فيها بروح مختلفة، وكمان محدش بيلبسها كتير، وده هيحسبب حبيبتك بأنك شايفها مختلفة ومميزة عندك، ومصر تجيبلها حاجة مميزة زيها.
أسعار الشنط دي مش غالي قوي، مقارنة بأسعار الهدايا عموما في الفلانتين، ده غير طبعا فرق الجودة والمتانة عن الشنط الصيني.
وفي الصور دي هتشوف معانا الأحجام والأسعار المختلفة للشنط.
الحجم الصغير: 20عرض ×20 طول
السعر: 130 جنيه
الحجم المتوسط: 27 عرض ×20 طول
السعر: 150 جنيه
الحجم الكبير: 30 عرض ×30 طول
السعر: 180 جنيه
الشال البدوي
الشال بيضيف لمسة مختلفة للبس، سواء في الصيف والشتاء. لكن الشال اللي بيقدمه «علاء» مش بس معمول هاند ميد، لكنه مصمم بقماش بدوي. وطبعا بيتميز بألوانه الكتيرة والمبهجة. أما السعر فهو 130 جنيها.
عنوان المحل
5 ربع السلحدار ..خان الخليلي.. الحسين.
علامة مميزة
السؤال على سنتر عزام. ولما تروح عند السنتر اسأل على «علاء» بتاع الشنط.
رقم تليفونه
01225566369
