خلطة سحرية للتعامل مع موظف الشئون في الجامعة
موظف شئون الطلبة في الجامعة المصرية كأي موظف في أي مصلحة حكومية، له طريقة خاصة في نظام شغله، ولا يمكن أبدا أنك تغير طريقته أو تعترض عليه، فهو دائما نائم وسط الأوراق والملفات، وعلى مكتبه كوب شاي بلبن وسندوتشات فول وبعض أعواد البقسماط بالسمسم، وحكايات وتفاصيل شخصية جدا عن حياته يجب الاستماع لحد النهاية من غير نقاش.
وإذا فكرت مجرد تفكير أنك تدخل لموظف شئون الطلبة محتاج أي خدمة أو حق من حقوقك كطالب عادي، فاختار يوم تنفض فيه لمحاضراتك، علشان خاطر «سياته»، يوم من بابه تقضيه في غرفة شئون الطلبة، أما بشوات الجامعات الخاصة فيابختهم فلتوا ولاد اللذين.
لكن إذا كنت طالب في إحدى الجامعات الحكومية وبتقابل الشخص ده دايما، فإليك بعض النصائح للتعامل مع موظف شئون الطلبة في الجامعة:
- ممنوع الانفعال
إذا انفعلت على موظف شئون الطلبة، وصرخت وزعقت، اضمن أن مصلحتك هتتأجل لحد ما تتخرج من الجامعة، حاول أنك لا تنفعل أبدا مهما تجاهلك الموظف ده وفضل عليك الأكل والشرب والكلام مع زمايله، حاول تكون عاقل وهادئ جدا بعيدا عن الغضب والانفعال وتضييع حقك.
- ممنوع الاعتراض
إياك أنك تعترض نهائيا على أسلوبه وطريقته في الشغل، أو أنك تقول جملة من جمل الاعتراض والزهق، يعني "حسبي الله ونعم الوكيل!" أو "أنا مش فاهم ايه الناس دي؟" أو ترفع وتحرك إيديك بعصبية، وإلا هتسمع صراخ وشكاوي من الشغل والعيشة وكلام كتير جدا وحقك هيضيع برضه وتخرج منفعل جدا
- اضحك في وجهه
أفضل طريقة للتعامل مع أي موظف حكومة عادي أو موظف شئون الطلبة تحديدا أنك تكون مبتسم وفرحان وأنت داخل الأوضة وتقوله "صباح الخير"، وقبل ما تطلب منه أي مصلحة أو أي شئ لازم تكسر "الحاجز الجليدي" –زي ما بيسموه- وحاول تتأكد أنه خرج من حالة موظف الحكومة ورجع إنسان عادي بيبتسم في وجهك، وحاول تخليه يرفع عينيه من الورق ويشوفك وانت مبتسم هتفرق معاك، واطلب منه مصلحتك وانت مبتسم، واشكره وانت مبتسم، واخرج من الأوضة وانت مبتسم
- حسسه بالاهتمام وقدر دوره
التزم مع موظف شئون الطلبة بشوية كلمات مهمة من "معلش هتعبك معايا" و"كتر خيرك" و"بعد إذنك بس" وكلام يحسسه أنك مقدر أنه تعبان وزهقان وكل حاجة، وفي نفس الوقت تقدر تطلب مصلحتك ويعملها عن طيب نفس ومرتاح.
- خليك «كيوت»
«لا تجادل يا أخ علي، وإلا وقعت في المحظور» أهم جملة ممكن تقال للتعامل مع موظف شئون الطلبة، مهم تكون مطيع ولا تجادل ولا تسأل ولا تعترض وقول (تمام وحاضر، والف الف مبروك ^_^ ) ونفذ المطلوب من ورق أو غيره، وحاول أنك تبعد عن الصدام معه على قد ما تقدر
من الاخر خليك ذكي وهادي وعاقل واعرف ازاي تتعامل مع موظف شئون الطلبة وتكسبه.
