رغدة جلال الدين تكتب: مواصفات الفتى المريخي
من أول ماسمعت خبر ان وكالة ناسا خلاص اكتشفت ان فيه ماية على سطح المريخ وأنا عمالة أتخيل وأقول لنفسي يا رغدة لو الولاد اللي هنا راحوا هناك برابطة المعلم هيبقى مواصفاتهم ايه !
يعني ماذا لو الولاد سابوا كوكب الأرض اللي شربوا نهر نيله وراحوا كوكب المريخ وشربوا نهر مريخه، السؤال ده أول ما سألته لنفسي قولت أكيد ده هيفرض عليهم ان يكون ليهم مواصفات تانية غير المواصفات اللي متعارفين بيها بحكم انهم هيكونوا في كوكب ليه مواصفات خاصة، أقولكوا تعالوا نشوف :)
مؤدب وكيوت
الفتى المريخي هيكون مؤدب مش هيبص على بنت ماشية في الشارع المريخي ولا هيحاول انه يلمسها أصل لو عمل كدة هتديله شلوت يخليه يطلع من المريخ ويختفي وسط الكواكب و ميبنش ليه أثر، يا نهار مريخي على شكله هيبقى مسخرة.
صحي ومزهزه
الحياة في المريخ هتكون مزهزهة فيها حيوية كدة وهتخلي الولاد حاسين بالنشاط والحماس واللي منهم بيضرب مش هيلاقي ضرب في المريخ فديه مصلحة انه يتعالج ويبقى زي الولاد النشيطة و فلة كدة :)
محب للطبيعة
الأفلام السيكو سيكو مش هتكون موجودة في المريخ وده معناه انه هيعيش طول حياته بيشوف النجوم في السما و يتأمل الطبيعة وهيصفي دماغه من السيكو اللي شافه والسيكو اللي سمعه قبل كدة.
بيفكر صح
الولد المريخي لو قابل بنت مريخية وحبها مش هيحتاج يعمل حسابه على فلوس يدوروا بيها على مكان يعملوا فيه فرح لأنه هيفكر يعمله في أي حتة في أرض المريخ، لأن هيبقى فوقيهم السما بنجومها وحواليهم الناس اللي بيحبوهم وكدة يبقى ايه، فلة :)
صبور
بما ان الرحلة من الأرض للمريخ طويلة فديه هتعلم الفتى المريخي الصبر عشان لو ملاقاش شغل في المريخ ميفقدش الأمل ويدور تاني وتالت وأكيد هيلاقي شغل في أي مكان ويارب يا سيدي نشوفك مالي مركزك كدة في شركة مريخكوا للعقارات.
مش فتّاي
الفتي المريخي هيكون خايف يفتي زي ما بيفتي هنا لما حد يسأله شارع النينجا ترتز فين يقوله يمين في شمال لأنه هيكون لسة بيكتشف الدنيا وهيخاف لو فتى فتية يزعل دار القضاء المريخي ويحاكموه.
غير مدخن
التدخين ضار جداً بالصحة ويسبب الطرد، ديه مادة رقم 3000 في قانون المريخين وعشان كدة الفتى المريخي هيكون شطور وبيسمع الكلام وهيحافظ على صحته :)
ديه كانت شوية تخيلات كدة عن الولاد في المريخ، طبعاً مش الولاد بس اللي هيروحوا احنا كلنا هنروح :) جايالك يا مريخ يا غالية :)
