الأسنان عنوانك.. اعرفي إزاي تحافظي عليها
بنلجأ لحاجات كتيرة عشان نبيض بيها الأسنان لأننا بنشوف قد أيه هنكون حلوين قوي لما أسناننا تكون بيضا ومنورة وشنا، ولأن مش كل حاجة بنحبها بتكون مفيدة لينا سألنا دكتور الأسنان نور الدين عبد اللطيف حجازي عن إزاي تحافظي على بياض أسنانك بشكل صحي وجاوبنا بنصايح مهمة هتقروها في الموضوع ده.
السنة بتتكون من طبقتين: طبقة المينا «الإينيمل» الشفافة وطبقة العاج الأصفر «الدنتين» اللي تحت المينا.
والأسنان بطبيعتها درجة اللون فيها بتكون متفاوتة من شخص لشخص ودرجة بياض السنان بتعتمد على سمك طبقة المينا وكل ما سمك طبقة المينا الشفافة قلت كل ما هتقل مقاومة السنة للتسوس وهيزيد إحساسك بالحاجات الساقعة ولون العاج الأصفر هيكون هو اللي ظاهر. لأن المينا وظيفتها إنها بتحمي سنانك من التسوس وبتحافظ عليها.
وعشان طبقة المينا تفضل بحالة جيدة الدكتور بيقولك إنك مش مستحب تبيضي سنانك لمجرد أنك عايزة شكلهم يكون حلو وأبيض ناصع زي النجمات لأنك كدة بتكحتي طبقة المينا وبتخليها عرضة للتسوس وكمان 90% من النجمات بياض سنانهم جاي من أنهم بيعملو تركيبات كتيرة وغالية جدًا عشان توصلهم للبياض ده .
وبياض سنانك هيكون ضروري لو حسيتي أنك من الناحية الصحية عايزة تبيضيها فساعتها بتلجأي للدكتور ومادام صفار سنانك بسيط يبقى حاولي بس أنك تنضفيها بشكل جيد بعد لما تاكلي أو تشربي أي حاجة فيها أحماض. اغسلي بوقك واشربي ماية وابعدي على قد ما تقدري عن الصودا لأنها بتضر المينا وبتؤدي إنها تتاكل.
ولو عايزة تستخدمي طرق في تبيض سنانك دكتور «نور» بينصحك إنك متستخدميش أبدًا أي حبيبات خشنة وتبيضي بيها سنانك لأنها بتكون مضرة جدًا في إنها هتاكل سطح المينا زي مثلًا الملح. ولو عايزة تستخدمي حاجة في التبييض الجأي للحبيبات الناعمة زي الكركم وحطيه على سنانك بفرشة صغيرة عشان ميطلعش على اللثة وميصفرهاش لأنه من الحاجات الكويسة لأنها مادة صحية في العموم ومفيدة للجسم بس برضه متستخدميهاش بشكل دايم خليكي معقولة في استخدامك.
أما الطريقة الصح لإستخدام الفرشة عشان تضمني إن سنانك تفضل كويسة استخدمي الفرشة من فوق لتحت ومن تحت لفوق للأسنان الأمامية أو بحركة نصف دائرية أما أسطح الضروس الخلفية هتبقى رايح جاي في اتجاه مستقيم من الأمام للخلف ومن الخلف للأمام.
ولما تيجي تشتري فرشة الأسنان هيكون قدامك اختيارت فرش Soft وmedium وhard. متختريش الـHard عشان هتكون ناشفة وهتكحت في المينا وتجرح السنة واختاري مابين الـSoft و الـMedium عشان هيكونوا ناعمين على المينا.
الوقت المناسب لغسيل سنانك بعد كل وجبة رئيسية ولو نسيتي يبقى اغسليها قبل ما تنامي واشتري أسهل فرش سنان صغيرة تكون معاكي بحيث بعد لما تاكلي تروحي ممضمضة بقك وممشية الفرشة على سنانك لأنها في النسبة ما بين 70 و75% بتقلل احتمالية إن يحصل تسوس للسنة وتبقى ضعيفة.
