العالم بيلعب وإحنا منعرفش !

انت تعرف كل الرياضات إللى فى العالم أو حتى فى بلدك؟ أه أعرفها .. بلاش فذلكة تعرف لعبة إسمها "أولمبياد الطين"؛ لا معرفهاش.. طيب تعالى اعرف أغرب وأشهر الرياضيات الموجودة فى العالم .. بس نصيحة لو هتجرب جرب إللى تقدر عليه.

كرة فى الوحل

هي كرة قدم شبه كرة القدم التقليدية لكن بتتلعب فى ملاعب خاصة مليانة  مستنقعات طين ووحل ليها اتحاد عام لكرة القدم الموحلة؛ بيقام ليها كاس عالم كل سنة أو اتنين؛ الدول المشهورة برياضة كرة الطين (الهند، الصين، أمريكا، البرازيل، إيطاليا، كوريا وفرنسا).

اللى يميز اللعبة دي إن ممكن تكون مختلطة بين الرجالة والستات يعنى الفريق الواحد فى اللعبة بيتكون من 6 لاعيبه منهم ست واحدة أو اتنين؛ مدة المباراة 24 دقيقة فقط كل شوط 12 دقيقة.. والمدة الزمنية دي متفق عليها من أول مباراة لكرة القدم الطينية من 15 سنة فى أمريكا وفلندا.

اتزحلق على الصخر

فى بلاد كتير بتستنى موسم نزول التلج عشان التزلج على الجليد خاصة بلد زى استراليا وأستوريا وغيرها من البلاد إللى بتشتهر بالتلج.. لكن الكوكب بيعمل مع الناس اللى بتحب اللعبة ديه عكس عكاس.

فى السنين الأخيرة الموسم جه ومنزلش تلج خالص وطبعا عشان أغلب الدول ديه تعلمهم نضيف فكروا وابتكروا رياضة "التزلج على الصخور" رياضة خطر ومرهقة جداا لكن اللى جدربها استمتع بيها ومبقاش حد بيستنى التلج.

نط فوق الجمل

"اشمعنى الجمل" ممكن تسأل نفسك ليه الجمل عن أى حيوان تانى عملوله رياضة.. في منطقة "سهل تهامه" فى "اليمن" بيشتهروا بالجمال وفى نفس الوقت بلياقة شبابها ومن العصور القديمة للبلد كانت لعبة القفز فوق الجمل هى أهم رياضة فى المنطقة وبتعبتر فى أوقات كتير هى الوحيدة لدرجة إنها بقت فقرة أساسية فى مراسم الزواج؛ بيتباروا فيها شباب القبائل بأكتر عدد من الجمال هتقدر تقفز عليهم فبتدأ اللعبة بجمل واحد لحد ما توصل لـ 5 جمال وأكتر

الهوكى على عجلة

اللعبة عامة هي شبة كرة القدم بس بتستخدم فيها عصاية كبيرة مقوسة من أخرها بتتلعب دايمًا فى ملاعب تلج لإنها بتندرج تحت ألعاب التزلج إللى بتشتهر بيها  (النمسا، انجلترا، استراليا، هونج كونج، الدنمارك، السويد)

الموضوع موقفش على "هوكي العجلة".. اللعبة اتطورت وبقى ليها أنواع مختلفة زى "هوكى الحقول" هيا نفس الفكرة لكن باختلاف المكان؛ ومع اشتهار اللعبة اتصعبت أكتر وبقت بتتلعب وانت راكب عجلة أحادية وبالتالى اللعبة عايزة لياقة بدنية وتوازن غير أى لعبة تانى.

أولمبياد الطين

تتلعب فى مدينة "بورنشياتل الألمانية" مجموعة من الإلعاب الرياضية تقام جميعها فى الوحل زى كرة القدم وكرة اليد وسباق الجرى.. يعنى كل رياضة ممكن تتخيلها بتتلعب لكن فى الطين

ملاكمة الشطرنج

فيها الملاكمين بيتبارو فى لعبة الشطرنج على حلبة المصارعة وهما لابسين لبس الملاكمة؛ اللعبة على 11 جولة يسمح فيها استخدام العضلات بجانب العقل متقسمين جولة ملاكمة وجولة شطرنج بين كل جولة 3 دقايق بس.

اللعبة بدأت من 2003 فى ألمانيا و دخلت فيها ملاكمة السيدات واتكونت مراكز كتير تدريب للعبتين.

إمشى بين جبلين

رياضة التسلق على الجبال بيكون فيها احتياطات أمنية كتيرة يعنى حفاظًا على المتسلق بغض النظر إنها مغامرة ولا لأ بس المغامرة إلى مفهاش أى إجراء أمنى واحد إنك تمشى على حبل متعلق بين جبلين من غير أى حزام أمان ممكن يربطك بجبل أو حتى صخرة.. بس فى الأغلب بيكون الإجراء الوحيد إن الحبل يكون تحته بحيرة أو نهر.. بس نصيحة لو مبتعرفش تعوم أو حظك وحش بلاش الرياضة ديه لإنك فى الحالتين ميت ميت.

التزلج الشراعى على الماء

"الزحلقة على الميه" ده معناها عندنا فى مصر لإنها تعتبر من أكتر الرياضيات إللى بتتلعب فى العالم موجودة فى مصر؛ فى مناطق معينة زى البحر الأحمر الغردقة وشرم الشيخ؛ اسماها عالميًا" كايت سيرفين".. اتضمت للألعاب الأولمبية في دورة ريو دي جانيرو 2016 وبعد كدة اتلغى القرار لكن فضلت الرياضة تمارس فى العالم كله لدرجة إن عدد الممارسين ليها وصل لـ مليون و500 ألف حسب تقدير الاتحاد الدولى للتزلج الشراعى.

يمكن الكل عرف الرياضة ديه أكتر بعد إعلان "كوكاكولا"  لـ "ثانية بتفرق" إللى عرض فيه  فيديو عن بطلة التزلج الشراعي "إنجى المر".