10 نصائح هتخليك تهزم «التردد»
مين مننا ما مرش بلحظات حس فيها إنه متردد ومش عارف ياخد قرار. صحيح إن في ناس بتعرف تتغلب على الإحساس ده، بس في كتير بيعيشوا ويموتوا «مترددين».
متقلقش.. بعد التقرير ده هتعرف تتغلب على ترددك مع نصائح مدربة التنمية البشرية بسمة الوسيم، واللي قالتهالك عبر «شبابيك».
حدد أهدافك
مينفعش تكون عاوز تخلص من التردد وأنت أصلًا معندكش هدف عاوز توصله، تحديد الهدف هنا هيريحك من مشاكل كتير أنت في غنى عنها لإن الإنسان لما يكون محدد في أهدافه هيعرف كويس هو عاوز إيه ويوصله وبالتالي مش هيكون في تردد.
ضع خطة للتنفيذ
لو حددت أهدافك من غير ما تحط خطة هيبقى كل اللي عملته مالهوش أي لازمة، الخطة هنا مهمة لإنك هتحط مواعيد للتنفيذ بس الشغل العشوائي هيخليك تفضل تأجل.
وكل لما الوقت يتأخر، هيظهر حاجات تخليك حاسس إن هدفك مش صح أو إن الكلام اللي سمعته هيخليك تندم.
لا تهتم بالناس
معظم اللي مبيحققوش هدف نفسهم يوصلوله بيكون السبب في ده هو اهتمامهم بالناس وكلامهم، منهم اللي بيحطوا أهدافهم بناءً على رغبات أهلهم ومنهم اللي بيحسوا إنهم هيغلطوا غلطة كبيرة ومنهم اللي دائمًا متشائمين.
الناس دي هترجعك لورا ألف خطوة، متترددش فإنك تمحيهم من حياتك ومتأخدش رأيهم في شىء.
متخافش
تذكر دائمًا أن أجمل الأشياء هي التي بدأت بمجازفة، علشان لازم تقول لنفسك إن خوفك من إن يكون مش دي الحاجة اللي إنت عاوزها أو إن الخطوة دي هتخليك تندم أو إنك ممكن تخسر نفسك وفلوسك بسببها، هيسببلك مشكلة طول وعمرك وهي إنك هتفضل متردد وأسير الخوف ده.
اتحمل المسؤولية
معظمنا بيتردد لما يكون خايف إنه يتحمل المسؤولية، من دلوقتي قول لنفسك «هتحمل المسؤولية وهجرب أكون أنا المتحكم في مصيري، هفشل وإيه المشكلة لما هفشل أكيد هعرف بعدين إزاي تنجح».
التجربة اللي هتعيشها هنا هتعرفك كتير وهتزود ثقتك بنفسك وبعدها مش هيكون في أي تردد.
افهم نفسك
اوعى تحكم على نفسك من كلام الناس، لازم تدرس كويس نفسك وتعرف هي عاوزه إيه، لإن أحيانًا ترددنا بيكون ناتج من إننا مش فاهمين نفسنا ولا عارفين ده فعلًا اللي إحنا عاوزينه ولا لأ؟.
التجربة بتعلم كتير
لو قولت لنفسك إن التجربة اللي هتفشل فيها هتتعلم منها كتير عمرك ما هتتردد بعد كده في أي شىء، على العكس من التردد اللي بيخليك دائمًا متجربش وبالتالي عمرك ما هتتعلم.
الفشل يقود للنجاح
إيه المشكلة لو فشلت مرة واتنين وعشرة، أهم حاجه إنك متخافش من الفشل واوعى تترد لحظة في إنك تحقق حاجه إنت عاوزها.
حط في بالك دائمًا إن التردد أحيانًا بيضيع علينا فرص لو كنا استغليناها صح عمرنا ما كنا هنندم بعد كده.
زود خبراتك
تنوع الخبرات عندك هيساعدك في زيادة الثقة بالنفس وهيخليك قادر تتغلب على التردد وهتوصل لمرحلة إنك مبتثقش غير في تفكيرك.
اسأل ذوي الخبرة
لو حاسس إنك مش عارف تأخد قرار في حاجة أو حابب تتأكد من صحة قرارك، أسأل ناس ليها خبرة في نفس الشيء يعني مثلًا حد جرب الماركة دي أو الشغل ده يقولك ع المزايا والعيوب.
بس راعي بردوا إن مش كل الناس زي بعضها وممكن اللي هو يفشل فيه أنت تحبه وتنجح فيه.
