دليلك للتعامل مع الشخصيات «الرخمة» في 5 نصائح
مين مننا مبيقابلش في حياته شخصيات رخمة بتخليه يكره الحياة لمجرد إنه مش عارف يرد عليهم! صحيح في ناس بتعرف تتعامل كويس مع الرخمين بس الأغلبية مبتعرفش وده مبيكونش راجع لضعف منهم قد ما هو إحترام لنفسهم.
الموضوع مش صعب بس عاوز تدريب، وعلشان كده «شبابيك» بيقدملك في التقرير ده 5 نصائح لو نفذتها هتعرف تتعامل مع الشخصيات الوقحة.
إتعامل ببرود
لازم تعرف كويس إن الشخصيات الرخمة بتكون ضعيفة من جواها، علشان كده أفضل رد فعل لازم تتعامل بيه هو البرود؛ لإن التصرف ده هيحسس الشخص اللي قدامك إن كلامه مأثرش فيك.
مرة على مرة هيحس إن كلامه مالهوش أي تأثير عليك وفي الوقت ده هتلاقيه هو اللي بيتجنب التعامل معاك، أو ممكن لو هو شخص عصبي يتنرفز من برودك وبدل ما يحاول هو يعصبك هتلاقي نفسك بتعصبه من غير ما تغلط.
متشغلش تفكيرك بتصرفاته
طول ما أنت بتفكر في هو ليه بيتصرف معاك بالشكل ده؟ مش هتوصل لإجابة تريحك وحتى لو فكرت إنك تروح تسأله؟ بردوا مش هترتاح؛ لإن إجابته هتحسسك إنك مريض نفسيًا وإنه ميقصدش يتعامل معاك بالشكل ده.
علشان كده أفضل حل هو إنك تتجنب المواجهة معاه وإتعامل معاه بنفس الأسلوب بتاعه؛ لإن ده ممكن يحسسه بفظاعة أسلوبه معاك ده في حالة إنه ميكونش قاصد، ولو عارف كويس هو بيعمل إيه يبقى لازم تتعامل بشكل ميتعبش أعصابك.
قابل تصرفاته بابتسامة
الرخم بيبقى في أغلب الأوقات عارف إنه وقح وإنه قاصد بتصرفاته يضايقك علشان كده لازم وإنت بتتعامل معاه تخلي إبتسامتك هي رد الفعل على أي تصرف أو كلمة منه.
هدوءك وإبتسامتك ممكن يعملوا اللي إنت متقدرش تقوله بلسانك، وفي الوقت ده مع تكرار الموقف هيبعد عنك تمامًا علشان يتحاشى برودك.
اعرف مفتاح شخصيتهم
لكل واحد مننا مفتاح لشخصيته، لو عرفت مفتاح شخصية الوقح ده هيوفر عليك مشاكل كتير؛ لإن في ناس بيكون تعاملها رخم لإنهم حابين أوي يتعاملوا معاك ويقربولك بس دي شخصيتهم وأسلوبهم في التعامل اللي مش عارفين يغيروه.
وفي الوقت ده لو فعلًا هو أسلوبه رخم بس نيته كويسة إنت تقدر تغير منه شوية بشوية وده على العكس تمامًا من الشخصيات اللي هي أساسًا رخمة بطبعها دول بقى لو مش عارف تتعامل معاهم بالنصايح دي يبقى إبعد عنهم فورًا.
درب نفسك على ردود توقفه
شىء كويس إنك تتعامل مع الشخصيات دي ببرود وأحيانًا من غير كلام خالص، بس في شخصيات مش بتكتفى بالبرود وبتبقى محتاجه ردود توقفها عند حدها.
علشان كده لازم تراعي في ردك إنه يكون حازم، يعني إستخدم معاه كلام زي «دي حياتي الخاصة- لو احتاجت رأيك هقولك- مبحبش حياتي تكون على المشاع- أنا الوحيد اللي في إيدي القرار».
