طالب وبتفكر تعمل مشروع.. اعرف معانا الخطوات

كل ما فكرت من دلوقت وأنت بتدرس إنك تبدأ مشروعك الخاص بجانب دراستك كل ما خبرتك زادت من بدري في مجال الإحتكاك بسوق العمل وفي إنك كمان تكون مستقل ماديًا. في الموضوع ده هنقولك إيه هى الخطوات اللي تأسس بيها مشروعك الخاص.

الفكرة والأهداف

حدد فكرة وهدف لمشروعك وطبعًا لازم تفكر في فكرة مشروع تخدم بيه الناس يعني لو فكرت مثلًا في فكرة منتج ما فكر إذا كان المنتج ده مطلوب في السوق ولا لأ وده عشان تضمن نجاحه لأنه لو مش مطلوب مش هيحقق نجاح.

ففكر في منتج تستهدف بيه شريحة كبيرة محتاجاه لأن تفكيرك في استهداف الشريحة هيكون خطوة مهمة جدًا في نجاح مشروعك وتحقيقه للربح ومش بس تفكر في الشريحة لأ ده أنت تدرسها كمان بمعنى إن المنتج ده هتستهدف بيه الرجالة ولا الستات ولا الإتنين ولا الأطفال وده لأن كل شريحة طريقة التعامل معاها هتكون مختلفة عن التانية.

الخطة

طبعًا المشروع بدون خطة منظمة ومرتبة هيكون مشروع فوضوي مش باين راسه من رجله، وعشان كدة إرسم خطة سجل فيها كل الخطوات في نقط معينة اللي هتساعدك في تنفيذ مشروعك.

يعني اكتب أنت محتاج إيه ومين الشريحة اللي بتستهدفها وهل عايز حد يشاركك في المشروع ولا لأ وإيه الميزانية اللي هتحتاجها لتمويل مشروعك وديه نقطة مهمة قوي فلازم تأمن الفلوس الكافية لتمويل مشروعك.

وديه أرضية مهمة هتثبتك في السوق بنجاح ومش هتعرضك للديون فلازم تعرف أنت محتاج فلوس قد إيه تغطي الحاجة اللي إنت عايزها عشان تكون مأمن مشروعك وضامن إنه يستمر بنجاح.

وبعد الميزانية لازم تعرف إيه الخطوات القانونية اللي هترخص بيها مشروعك عشان المشروع ميتعرضش للمسائلة القانونية ويكون في نظر القانون مشروع مش مترخص ويتهد فجأة وعليك إنك تكون عارف كل التفاصيل القانونية اللي مفروض تعملها عشان تأمن مشروعك وترخصه وممكن تسأل في ده محامي عشان يدلك على الأمور الصح اللي مفروض تعملها.

وكمان لازم تفكر هل عايز تأمن نفسك بإنك تجس نبض الناس الأول بالمنتج لمدة معينة وبعدين لو لقيت إقبال كبير تزود المدة. وإجاباتك على كل الأسئلة ديه في نقط محددة هيخليك تشتغل بشكل منظم ومحدد.

فريق العمل

لو عايز حد يشاركك في المشروع يبقى تختار ناس تكون واثق فيهم وعارف إنهم هيكونوا متحمسين لفكرتك وإنها هتشدهم وتخليهم يشاركوك في المشروع لأن كل ما كان شركائك متحمسين للفكرة كل ما روح الفريق هتكون قوية بينكوا والمشروع هينجح ويكبر.

سوق المنافسة

إحصر الشركات المنافسة ليك وشوف هى بتقدم المنتج إزاي وعوامل تميزها إيه وشوف إيه الفروق بينهم وبينك وركز على الناقص عندك وحاول تنميه عشان تدخل في مجال المنافسة معاهم وتكون متميز عنهم.

التسويق

مشروعك لازم يتسوق كويس جدًا على أوسع نطاق عشان يوصل لكل الناس وبما إنك حددت المنتج بتاعك هتستهدف بيه مين فده هيسهل عليك تسويقه وطبعًا السوشيال ميديا عامل مهم قوي في تسويقك لمشروعك لأن بالسوشيال ميديا هتضمن إن المشروع بتاعك يتعرف بشكل كبير.

وأخيرًا إختار شعار وإسم لمشروعك يعبر عن فكرتك وفي نفس الوقت يجذب الناس ويلفت نظرهم ويخلي عندهم فضول إنهم يعرفوا تفاصيل أكتر عن المشروع وده طبعًا هيبقى مهم جدًا في الدعاية لمشروعك والوصول لكل الناس.