الحاجات دي بتجذب البنات ليك.. صحصح يا برنس
زي ما أنت بيجذبك للبنت حاجات معينة، البنت كمان بيجذبها ليك حاجات معينة ممكن ييجي في بالك وإنت بتقرأ «أه عارف الشكل»، الله ينور عليك الشكل فعلًا بس أهم من الشكل الشخصية لأن الإتنين بيكملوا بعض.
اقرأ الموضوع بقى واعرف حاجات ومحتاجات بتجذب البنت ليك بس حطها «حلقة في ودنك».
رشيق
اعتبر الرياضة شيء مقدس في حياتك، ومارسها في اليوم حتى ولو نص ساعة في الجيم أو في النادي أو مشي في الشارع لأنها بجانب إنها هتحافظ على صحتك هتحميك كمان إن يطلعلك كرش.
لأن الكرش مش عز زي ما بعض الرجالة بيقولوا لأ ده ممكن يتقل حركتك وممكن يسببلك أمراض. فمارس الرياضة عشان تحس باللياقة والرشاقة :)
خليك أحلى وأحلى زي عمرو :D
إن الله جميل يحب الجمال، وعشان كدة اهتم إن لبسك يكون على سنجة عشرة، ومش معنى كدة إنك تجيب لبس ماركات وغالي لأ مش شرط المهم تجيب لبس يكون متناسق مع بعضه وشكله شيك لبس يحسسك إنك مبسوط وإنت لبسه.
ومع اللبس اهتم إن جزمتك تكون مغسولة وساعتك تكون منورة إيديك ولو مش بتحب الساعات مش مشكلة يعني.
بس حاول تاخد من صاحبك أي ساعة وتشوف شكلها على إيديك هتلقيها مدية شكل حلو واهتم كمان إنك تحط برفيوم ويكون فايح منك كدة زي ما بيقولوا. ولو إنت بتربي دقن هندمها يعني ظبطها وخليها يبقى شكلها كويس متسبهاش لغاية ما تطول قوي يعني وتبقى «هوجائية» كدة ملهاش شكل معين وشعرك كمان إهتم إنك تقصه قصة كويسة من حين لأخر.
وطبعًا مع كل اللي فات ده لازم تكون نضيف ومواظب على نضافتك وضوافرك تكون نضيفة ومقصوصة كويس ومحافظ على بياض سناك وإستخدامك لمزيل العرق وحط تحتيته كذا خط، وخليك دايمًا فاكر إن ربنا عايز يشوفك جميل ونضيف ومهندم لأنه بيحب الجمال.
متبقاش زي عيسوي :D ومع الشكل في حاجات في شخصيتك لازم تهتم بيها لأنها هتبقى سبب في جذب البنت ليك ولو ضمنتها مع الشكل حتبقى عظمة على عظمة :)
طموح
تكون طموح عندك هدف بتسعى ليه وعايز تحققه مش عايش في الحياة وخلاص.
مثقف
إنك تقرأ كتير وتاخد خبرة من اللي بتقرأه ويكون ليك رأيك الخاص اللي كونته بعد قرايات كتيرة وكمان قرايتك هتكون خبرة تتعامل بيها في الحياة. شوف سمير حماه قابله إزاي ؟ خلي بالك بقى.
أخلاقك راقية
إن تكون أخلاقك كويسة وعارف ربنا مش من اللي لسانهم طويل ولما يتعصبوا يضربوا اللي قدامهم سواء بنت أو ولد.
بتحترم الأنثى
بمعنى إنك تحترم فكرها وأحلامها وأرائها، متحسسهاش إنها مش فاهمة حاجة وإنت اللي فاهم كل حاجة وتعملها إعتبار وتكون عارف إن ليها كيانها.
بتعبر عن مشاعرك
إنك متكونش جامد في مشاعرك وتعبر عن كل الحب اللي جواك تجاه البنت اللي بتحبها ومتبصش على إن ده ضعف أو إني لو قولتلها كدة هى هتتفرعن عليا.
