رغدة جلال الدين تكتب: حبك الأول في أولى جامعة
أنا شايفاكي وانتي بتقري كلمة حب دلوقتي وبتتنهدي كدة :) ، شكلك وقعتى وحبيتي وتلاقيكي دلوقتي بتسمعي أغاني وبتتخيلي صورة فارس الأحلام ، وبتحلمي بيه وفاكرة نفسك جوليت وهو روميو، بس قبل ما تسرحي في حلمك كتير عايزة أتكلم معاكي شوية.
طالعة من الثانوية داخلة الكلية
واحنا في المدرسة كنا بنحلم نبقى مرتبطين ويكون لينا حد بيحبنا ويخاف علينا ، وده من كتر ما كنا بنشوف حوالينا ناس كتير بترتبط وتتجوز وكمان من كتر فرجتنا على الأفلام الرومانسية اللي كانت بتأثر فينا جامد وكنا بنتمنى نكون مكان أبطالها، وفضل ده جوانا لحد ما دخلنا الجامعة.
أول يوم جامعة
في أول يوم بتكوني حاطة في دماغك انك هتلاقي فارس أحلامك هنا وهتتقابلوا صدفة وهتحبوا بعض ومع أول كلام يقولوا ليكي ولد هتفتكريه معجب بيكي وهتبدأ عندك الرومانسية تعلى مع انه بيتكلم عادي مش قصده حاجة، بس انتي عشان حاطة في دماغك ان الجامعة هتكون فرصة انك تلاقي فارس أحلامك فيها فعشان كدة فكرتي كدة، فلو صدقتيه هتقعي في خية الحب الوهمي.
الحب الوهمي
أسوأ أنواع الحب لأنه هيأذيكي نفسياً لأنك هتفضلي تبني قصص رومانسية في خيالك من مجرد كلمة اعجاب سمعتيها وهتأذي قلبك أذى جامد لأنك هتخليه كله يروح لحد أصلاً مش بيحبك وهتاخدي وقت كبير جداً على بال ما ترجعي قلبك تاني صافي من مرض الحب الأول، أما لو قالك بحبك.
بحبك
مش كل ولد بيقولك بحبك يبقى بيقولها جد لأن فيه ولاد بتقول كلمة بحبك زي أي كلمة عادية في قاموس كلامهم اليومي والولاد اللي بتقول الكلمة ديه زي أي كلمة عادية مبيكونش عندهم مسئولية و لاتخطيط ولا رؤية للمستقبل ولو انتي صدقتيهم هتوقعي في بير ملوش قرار لأنه بعد لما يخلص الجامعة هياخد رجله في سنانه ويا فكيك، فمتستنيش الحب.
الحب
قدري زيه زي الموت متعرفيش معاده امتى عشان كدة مدوريش عليه، عشان ميهربش منك وسيبيه يجيلك لوحده عشان تفرحي فرحة من القلب، واطمني قصص الحب اللي بشتوفيها في الأفلام موجودة على أرض الواقع بس زي ما قولتلك سيبيها تيجي لوحدها لحد عندك وأهم حاجة دلوقتي ذاكري وجيبي تقدير عالي عشان يبقى ليكي كيانك :) .
