قنوات تعليمية لازم «طفلك» يتفرج عليها
كتير من الأمهات بتخاف من فكرة تعامل ولادها مع موقع «يوتيوب» على اعتبار إنهم ممكن يتعرضوا لفيديوهات مش مناسبة لسنهم، صحيح إن ده ممكن يحصل بس ممكن تسيطري عليه لو عرفتي تستخدميه صح.
في البداية لازم تعرفي إن الحضانة والمدرسة وقنوات التليفزيون عوامل مساعده ليكي في التربية، بس لو حابه تطوري أكتر من ولادك لازم تعرفي القنوات دي باعتبارها أهم قنوات تعليمية للأطفال على اليوتيوب.
- busybeavers
لو عندك مشكلة في ممارسة اللغة مع إبنك أو بنتك، القناة دي هتخليهم يمارسوا اللغة على شكل أغنية.
من مميزاتها إنها بتخاطب الأطفال في مرحلة ما قبل المدرسة، الروضة، والمرحلة الإبتدائية، وبالنسبة للمحتوى هتلاقيه مناسب لجميع الأطفال اللي عاوزين يتأسسوا في اللغة الإنجليزية.
- Hooplakidz
لو طفلك لسه مدخلش المدرسة، لازم يشوف القناة دي؛ لإنها هتساعدك إنتي كمان في تعليمه الأخلاق الحميدة والسلوك الصحيح عن طريق الأغاني. اقرأ أيضًا⇐طفلك بيكره التعليم؟ الحل عند «مونتيسوري»
هتلاقي فيها كمان أنشطة تعليمية وترفيهية هتأهله بعد كده في مرحلة الدراسة وبالتالي لو حاسه إنه منطوي مثلًا هتقدري تخرجيه من الدائرة دي بنشاطات هتعرفه العالم اللي حواليه.
- SesameStreet
دي بقى سلسلة تلفزيونية أمريكية تعليمية للأطفال، هدفها إنها ترتقي بالمستوى التعليمي للطفل من خلال الجمع بين الترفيه والتعليم.
فيديوهاتها بتوصل للأطفال في أكتر من 150 بلد، وبتعتمد في الأساس على اكتشاف امكانيات الأطفال وبالتالي مساعدتهم وأسرهم على تطوير المهارات دي.
- Super Simple Songs
القناة دي قايمة في الأساس على تعليم الأطفال عن طريق الأغاني وبس، كمان الأمهات اللي بتعاني مع ولادها بخصوص ممارسة اللغة تقدر تشوفها وتقوي نفسها علشان تعرف تتعامل صح مع ولادها.
ولو مجالك أساسه التعامل مع الأطفال، فأنت هنا محتاج تشوف الفيديوهات بتاعه قناة سوبر اللي هتساعدك في اكتشاف طرق مبتكرة في مجال تعليم الأطفال، مش بس كده هتلاقي كمان فيديوهات خاصة بأولياء الأمور علشان تساعدهم في ممارسة اللغة، بالإضافة لجزء ذوي الاجتياجات الخاصة.
- Telmo and Tula
«تيلمو وتولا» هتساعدك في تطوير مهارات أطفالك من خلال فيديوهات بتعلمهم حرف جديدة أو بتطور مهارة موجودة بالفعل عنده عن طريق الرسوم المتحركة. اقرأ أيضًا⇐حيلة ذكية تجعل طفلك يتوقف عن البكاء في ثوانِ
علشان كده لو نفسك تنمي مهارة معينة عنده بس الفلوس موقفاكي، شوفي القناة دي وخليه يتابعها لإنها هتعلمه كل حاجه بدايةً من «الحرف اليدوية وحتى مهارات المطبخ».
