قولها بحبك.. بـ7 طرق مختلفة
«بحبك» كلمة ليها عظمتها وجمالها وعشان كده لو فيه بنت بتحبها وعايز خلاص تعترف ليها بحبك لازم تستعد إنك تقول الكلمة دي بشكل مختلف، شكل يليق بعظمة الكلمة.
في الموضوع ده هنقولك إزاي تقولها بحبك بطرق مختلفة نقلا عن موقع Life hack K بس بطريقتنا المصرية.
غني
لو بينكو أصحاب مشتركين رتب خروجة معاهم تكون هى موجودة فيها وفي نص الخروجة قوم فجأة وقولهم يا جماعة عايزة أقولكو حاجة وروح باصص ليها وإبتسم وغنيلها أغنية كلامها بيعبر عن حبك ليها :)
رسالة
ابعتلها رسالة من كلمة واحدة بس.. بحبك :)
وسط الكلام
لو جمعكو مكان صدفة انتهز الفرصة دي، وافتح معاها كلام في العادي وفي نص الكلام قولها «بحبك» زي مثلًا: عاملة إيه والشغل أخباره إيه «بحبك» ها بقى هتروحي إمتى «بحبك».
مرسال لحبيبتي
إبعتلها جواب مع حد واكتب فيه كل كلام الحب اللي نفسك تقولوا ليها ويا سلام لو قولتوا بطريقة الحكاية إنك تحكي بداية دق قلبك ناحيتها كان إمتى :)
وكلمها أول ما تعرف إن الجواب بقى في ايديها واعرف ردها.
وجبة أكل
لو خرجتوا بردوا مع أصحابكوا سوا وطلبت هى أكل انتهز الفرصة وحطلها في الطبق من غير ما حد يلاحظ ورقة صغيرة مكتوب فيها «بحبك» وإمضي باسمك ولما تبصلك ابتسم ليها ابتسامة حب :)
ملاهي
لو طلعتوا رحلة مع أصحابكوا ويا سلام لو كانت الملاهي وتركبوا قطر الموت وتنتهز الفرصة وتركب جنبها وتقولها وانتو طايرين في السما «بحبك» :)
شبكة توصلك حبك
لو رقم موبايلها فودافون أو أورنج أو إتصالات اتصل بالشركة بتاعتها وقولهم إنك عايز تبعت لرقمها رسالة بس باسم الشركة إذا كان ده متاح واحكيلهم القصة إنك بتحبها وخلاص هى ديه اللي قلبك إختارها وهتكمل معاها مشوار الحياة.
اخترنا لك
