احمي نفسك من صديقك السلبي
بنقابل كل يوم أشخاص مختلفين منهم الإيجابي والسلبي، ونتأثر بيهم سواء في تغيير المود والمزاج أو في التفكير بنفس طريقتهم، لكن أسوأ شئ أن صديقك أو شخص من أهلك يكون سلبي ويأثر في شخصيتك لدرجة الإحباط والاكتئاب وتغيير أفكارك وطموحاتك وحياتك، دلوقت اعرف ازاي تتعامل مع الشخص السلبي وتحمي نفسك من طاقته السلبية
- لا تسمع أرائه السلبية
أول ما تسمع أراء صديقك السلبي في الحياة والتشاؤم في كل حاجة، وأن العيشة صعبة في الشغل والبيت والأصحاب المنافقين والخيانة والحقد والإحباط والدنيا بشعة، أوعى تؤمن بالأفكار السلبية تماما، لأن كل الكلام ده نظرته هو للحياة، وخبراته السيئة في الدنيا، لكن الحقيقة أن الدنيا فيها كل شئ، وكله حسب نظرتك أنت وخبراتك، يعني أبسط مثال لو قلت "الورد"، فيه شخص هيقولك الورد كله شوك، وفيه شخص يقول الورد جميل ورائحته حلوة، وطبعا كل الكلام حسب نظرة الشخص سواء إيجابية أو سلبية.
- ابحث معه عن حلول
إذا سمعت كم المشاكل والصعوبات والإحباط الموجود في حياته، حاول تدور معه على حلول، وحلول بجد، وساعده يطبقها، أوعى تسمعه وتواسيه بكلام طيب، لأنه أولا هيتمادى في الكلام السلبي ويسب في كل شئ، والمشكلة الصغيرة تكبر، ثانيا أنت غصب عنك هتتأثر بكلامه وتحس أن الحياة معقدة وصعبة، لكن دور معه على حل واتنين وتلاتة، وأوعى تشغل تفكيرك جدا بمشكلته، وتنام وتقوم تفكر في المشكلة، كل دورك تساعده في البحث عن حل بس.
- أغلق يديك عند الحديث معه
أكيد عارف لغة الجسد وأنها شئ مهم جدا تعبر به عن نفسك، أهم شئ في الكلام مع شخص سلبي أنك تقفل إيديك وأنت بتتكلم معه لأنك هتكون قفلت مراكز الاستقبال عندك، وشئ بيسموه مجال الطاقة، يعني أي طاقة داخلة جسدك من الشخص الأخر هتمنع دخولها، وبالطريقة دي تكون حميت نفسك من طاقته السلبية
- لا تتحدث عن طموحك
لو قلنا (داري على شمعتك تقيد)، فممكن نقول (داري على طموحك يتحقق)، احذر أنك تقول طموحك أمام أي شخص وخصوصا إذا كان الشخص تشاؤمي ومحبط، لأنه هيكسر طموحك ويصعب عليك الدنيا وكل شئ لدرجة أنك تكره الحلم والطموح وتقف مكانك ولا تتحرك خطوة قدام، طموحك سر خاص بك أنت، حققه في هدوء من غير ما كل الناس تعرف وتوقفك مكانك.
- أخبره عن مميزاته
أحيانا الشخص السلبي بيكون ضعيف جدا وحاسس أنه كله عيوب وأخطاء ومشاكل وأن الحياة صعبة معه هو، ولا يقصد أبدا أنه يأثر عليك ويحبطك، دورك هنا أنك تقويه وتحسسه أنه شخص عنده مميزات وفيه صفات كتير حلوة، الشئ ده هيفيدك أنت في نفس الوقت، على الأقل تكون وجهت طاقته السلبية تجاه شئ تاني بعيد عنك، وغيرت شئ من سلوكه، وحصنت نفسك منه.
