كيف تتعامل مع الأشخاص السلبيين؟
بعض الناس بيكونوا سلبيين بطبيعتهم، وممكن تكون ظروف نشأتهم أو المواقف اللي عدوا بيها في حياتهم هي اللي خلتهم كدا، وممكن يكون عندهم مشكلة في التفكير عامة.
اقرأ أيضًا ⇐ احذر.. 10 أخطاء في التفكير تدمر صحتك العقلية
أصدقاءك أو زملاءك في العمل أو قرايبك بيأثروا على موودك وعلى شخصيتك أكتر مما تتخيل، وعشان كدا لازم تعرف إزاي تتعامل معاهم.
- قلل وقتك معاهم
مهما كنت شخص قوي أو تفكيرك إيجابي، محيطك والناس اللي حواليك بيأثروا عليك، وخاصة لو الشخص السلبي دا مش عارف أنه كدا بيحبطك.
من المثبت علميًا أن السلبية تأثيرها مضر حتى على الصحة الجسدية، فمفيش داعي تأذي نفسك عشان شخص سلبي بطبيعته.
سواء كان الشخص السلبي في حياتك هو صديقك أو زميل دراسة أو عمل، حاول قدر الإمكان تقلل من الوقت الي بتتواجدوا فيه مع بعض عشان تقلل تأثيره عليك وعلى أفكارك وعقلك.
- اتكلم عن نفسك
لو أنت في نقاش مع شخص سلبي، وهو كالعادة بيتكلم كلام سلبي مليان بالشحنات السلبية، زي «مفيش فايدة» أو «كلنا محبطين ومكتئبين» هنا لازم تتكلم عن نفسك، تقوله وجهة نظرك أنت، لو هو هيسمع هيستفيد من كلامك ولو مش هيسمع دا أفضل ليك أنت عشان عقلك ميترجمش الموقف على أنك موافق عليه.
- لا تتظاهر أن سلبيتهم شيء طبيعي
دا خطأ بشع لازم تتجنبه، وهو أنك تحس أن الإحباط دا طبيعي أو إن السلبية هي العادي لأن معظم الناس كدا دلوقتي.
السلبية والإحباط مش حاجة عادية، دي مشكلة عند الاشخاص دول وبتأثر على الي حواليهم كمان، ولو الموضوع تطور لاكتئاب مثلا فهو في الحالة دي مريض ومحتاج يتعالج.
متتظاهرش أن السلبية شيء طبيعي حتى للأشخاص دول نفسهم، لو أنت قريب منه لازم توضحله انه عنده مشكلة.
- غير الموضوع
لو مضطر تتلكم مع الشخص السلبي، ولقيته بيحكي عن مشاكله وكل الازمات في حياته وأد ايه هي مشاكل ملهاش حل وأنه متضايق منها، حاول متسيبهوش يسترسل كتير في الموضوع، ممكن تفتح معاه موضوع عن حاجة تانية خالص تكون مشتركة بينكو، أو ممكن توقفه عن الشكوى وتتكلم أنت عن حلول لمشكلته.
الشكوى معدية، يعني أنت لا إراديًا هتلاقيك متعود أن محور أي محادثة يكون عن الشكوى، حد بيشتكي للتاني أو الاتنين بيشتكو لبعض.. وهكذا.
- احذر أن تفكر في مشاكلهم كأنها مشاكلك أنت
لما حد بيحكيلك كارثة أو مشكلة أو أي حاجة حصلتله، عقلك بيحاول يربط ما بينها وبينك، لو مفيش رابط هتبقى مطمن ومش قلقان من أي حاجة تحصل. زي أنك تسمع عن سقوط طائرة في باريس مثلا، دا ملهوش علاقة بيك ومش قريب منك.
لكن لو الشخص السلبي زميلك أو قريب منك، عقلك ممكن يفسر كلامه على أن المشاكل دي ممكن تحصلك أنت كمان وتبتدي تقلق وتندمج معاه في المشكلة كأنها مشكلتك. حاول تفصل وأنت بتسمع للشخص دا أن دي مشاكله هو مش مشاكلك أنت، مش لازم تندمج معاه لدرجة أنك تحس ان انت كمان عندك مشكلة.
- لا تتشارك معه خططك
اقرأ أيضًا ⇐ لهذا السبب.. لا تخبر أحدا بخططك المستقبلية
أخر حاجة تعملها مع الشخص المحبط أنك تحكيله عايز تعمل إيه أو نفسك تحقق إيه في حياتك.
لو عملت كدا يبقى ضمنت أنك تاخد كمية طاقة سلبية تخليك تشك في نفسك وتحبطك وممكن تعيد تفكير في أحلامك دي وتقول لنفسك في الأخر «أنا فعلا مقدرش أحققها».
اخترنا لك :
