«خدني معاك يا سي دوني».. فريق «Have a Dream» هيسفرك بره
كلنا بنحلم بالسفر بره مصر وأول ما تسمع صاحبك بيقولك: "أنا مسافر" تلاقيك بترد فورا وتقوله "خدني معاك يا سي دوني"، لكن فكرت قبل كده تسافر ازاي وفين ولما تسافر هتعمل ايه والخبرة والمكسب اللي هتاخده من سفرك ده.
"شبابيك" هيعرفك على فريق من أهم الفرق الشبابية اللي بيوفرلك فرصة للسفر وممارسة أنشطة تطوعية جديدة:
"Have a Dream"
فريق "Have a Dream" ده واحد من أهم الفرق الشبابية بيقدملك فرصة للسفر بره مصر يعني مثلا للصين واندونيسيا وغانا وتنزانيا وغيرهم كتير.
طب أنا هسافر معاهم ازاي؟
بص يا سيدي أنت هتملئ الاستمارة اللي بيحطوها على صفحتهم على "فيسبوك" لما يبقى فيه رحلة، يعني لازم تتابع دايما، وهما بيشوفوا الاستمارة ولو مناسب هيتصلو بيك تيجي تعمل انترفيو في مقرهم أو على الاسكايب لو أنت مش هتقدر تيجي.
إذا اختاروك ضمن الفريق اللي هيسافر هتدفع مبلغ معين بيبتدي من أول 6000جنيه تقريبا كده وبيتغير حسب المكان اللي بيعلنوا عنه وأسعار الطيران وغيرها، وطبعا شامل الإقامة والانتقالات والأكل، و 1000 جنيه مصاريف إدارية للفريق، ولزيارة صفحتهم اضغط هنا
هعمل ايه؟
أما بالنسبة لتروح تعمل ايه، فأنت هتعمل حاجات كتير أوي حسب النشاط التطوعي اللي بيعملوه في كل رحلة، يعني مثلا ممكن البرنامج التطوعي يكون تعليم لشباب جامعة أو طلبة مدرسة في دولة تانية، زي البرنامج اللي عملوه في سفرية الصين بعنوان "بيتكلم بالصيني" للتبادل الثقافي مع شباب الجامعة في الصين باللغة الانجليزية، وعمل مناقشات معاهم بالانجليزي برده، وده طبعا هيطور من لغتك ولغتهم، وهتتعرف على ثقافة وبلد وعالم تاني.
كمان برنامج غانا واللي كان في مجال الصحة، يعني تطوع في مستشفى أو مركز طبي هناك وتساعد الناس وطبعا ده محتاج شوية خبرة في مجال الطب، وكمان فيه مجال البناء يعني عمل فصول دراسية وصب أسمنت ودهان وغيرها
من ناحية تانية، أنت هتشوف بلد جديدة وهتتفسح برده وتتعرف على عاداتهم وأكلهم، وتاخد خبرة، وهتستفيد وتفيد غيرك وكله بثوابه، كمان هتتعرف على ناس جديدة من اللي مسافرين معاك وتكون علاقات وتتبسط
مين اللي عمل الفريق ده؟
بدأ الشاب محمود عبد المجيد في عمل فريق Have a Dream مع أصحابه بعد ما سافر للصين تبع منظمة اليونسكو لتدريس اللغة الإنجليزية للطلبة هناك، وجاتله الفكرة أنه يساعد غيره من الشباب للسفر والتطوع واكتساب خبرات جديدة، وعمل فريق شبابي من المتطوعين وبس، دلوقت وصل عدد المتابعين للصفحة إلى أكثر من 000, 19 متابع خلال سنة أو أكثر، وبيزيدوا يوم بعد يوم
يلا طير بره ما تفضلش محبوس في قفص، العالم واسع قدامك، اكتسب خبرة وجرب وسافر وماتنساش تاخدنا معاك "يا سي دوني" :)
