بتحبها ومش عارف تقول.. طرطق ودانك للكلام ده
وقعت لشوشتك في حبها وكل ما تنام تفكر فيها، وصورتها مش بتفارق خيالك بس مش عارف إزاي تصارحها بحبك لأن علاقتك بيها سطحية. متقلقش في الموضوع ده هنقولك إزاي تبينلها حبك. طرطقلي ودانك بقى.
اهتمامتها
قبل ما تصارحها لازم تهتم باهتمامتها عشان الإهتمام ده هيمهد فتح كلام بينكوا وإنك تصارحها في لحظة من اللحظات وإهتمامتها ديه هتعرفها من المقربين ليها واللي أنت تعرفهم هتسألهم وتشوف هى بتحب ايه أو يا سيدي اعمل عملية فحص وتمحيص للبروفايل بتاعها على تويتر أو فيسبوك أو إنستجرام.
وطبعًا ده هيبقى كنز بالنسبة ليك لأنك هتشوف الإيفينتات والورش اللي رايحاها وكمان الحاجات اللي بتحبها وبتعمل ليها شير، فاحفظ كل حاجة تشوفها صم عشان ندخل على النقطة اللي جاية دي.
رب صدفة خير من ألف ميعاد
دي بقى الجملة اللي هتروحلها وتقولها ليها أول لما تشوفها في الإيفينت أو الورشة اللي هى هتروحها واللي أنت رايحها مخصوص عشان تكون وياها ويكون في مجال انك تاخد وتدي معاها في الكلام.
وبعد ما تقول الجملة دي افتح معاها أسئلة وانتهز الفرصة واسألها عن أحوالها وإذا كانت أول مرة تيجي الإيفينت ده ولا هى متعودة تحضر، قال إيه يعني انت مش عارف إنها بتحبه، ونفس الحال لو كنتوا في ورشة اسألها برده إذا كان ده ليه علاقة بمجالها ولا حابة تنمي مواهبها كدة يعني.
وحاول بكل جهدك إن اليوم اللي هتشوفها فيه تسيب جواها بصمة وحالة إعجاب منها ليك وخلي بالك أوعى بصوت إبراهيم نصر في الكاميرا الخفية إنك تتلجلج في الكلام لو سألتك نفس الأسئلة اللي أنت سألتها ليها عشان متتفقسش والموضوع يبوظ.
ميعاد
بص بقى حركة الصياعة دي، وانتوا في الإيفينت هتقولها متعرفيش كدة أي حفلة لي.. لي ديه بقى إنت هتقولها بناءً إنك عارف الحاجات اللي بتحبها سواء كتاب مغنين شعراء وده لما بصيت على موقع التواصل الإجتماعي بتاعها فهتقولها أي حفلة لي مثلًا «كايروكي» أو أي حاجة تانية أنت عارف إنها بتحبها.
ولو قالتك أه ده فيه كذا قولها تمام قوي ما تيجي نروح لو بتحبي الباند ده. لو قالتلك أه يبقى كدة فل قوي انكتبلك ميعاد بينك وبينها :)
أنا جبتلك ده عشان..
بص بقى تاني معلهش الورشة اللي هى هتروحها هتبقى نسبة إنك تشوفها تاني كبيرة بما إنها ممكن تكون ورشة كذا يوم، وبما أنك سألتها في أول نقطة اتكلمنا فيها عن إذا كانت الورشة ليها علاقة بمجالها ولا هى حبة إنها تنمي مواهبها فأكيد إستشفيت هى بتحب إيه.
وبما إنك إستشفيت هى بتحب إيه فهتجبلها اللي بتحبه بمعنى يا أستاذ إنك مثلًا لو هي بتحب الديكورات وألوانها مثلًا هتجبلها كتب خاصة بالموضوع ده وتقولها «أنا جبتها ليكي عشان إنتي بتحبي الحاجات ديه».
وزود حاجة من عندك تبين ليها أنك معاها على الخط في أحلامها لأن البنت مننا يا زواوي بتحب إن شريك حياتها المستقبلي يشاركها أحلامها، يعني هتكمل كلامك وتقولها أنتي عارفة ممكن تفتحي ليكي في المستقبل مكتب ديكور لأن لما اتكلمت معاكي حسيت إنك عندك طاقة عظيمة لو استغليتها هتكوني مصممة ديكور متميزة :)
الأربع حاجات دول بقى لما تعملهم هى قلبها هيعجب بيك وأنت هتحس بده وفي اللحظة دي اقرأ موضوع: قولها بحبك.. بـ7 طرق مختلفة :)
