حماس زيادة أو انتحار.. تعرف على الاضطراب «ثنائي القطب»
ساعات بتحس أنك متحمس جدًا لحاجة معينة وبعد فترة صغيرة أو طويلة بيكون معندكش طاقة خالص تعمل أي حاجة ولا حتى اللي كنت متحمس له جدا؟.. لو دا بيتكرر كتير وبفترات طويلة دا معناه أنك ممكن تكون مصاب بإضطراب «ثنائي القطبين» أو Bi-Polar disorder.
زمان كان الاضطراب دا اسمه «الاكتئاب الجنوني» أو «الهوس والاكتئاب»، لكن دلوقتي بيعرف في الأوساط العلمية باضطراب «ثنائي القطب»، ودا مش زي أنك تكون متضايق شويا ومبسوط شويا، دا اضطراب له أنواع ودرجات كتير وبيفضل لفترة زمنية معينة، وبيتم تشخيصه من دكاترة نفسيين، يعني في فرق بين شخص مزاجي وشخص مصاب باضطراب «ثنائي القطب».
اقرأ أيضًا⇐ أنت لست مصابا بالاكتئاب كما تظن
الاضطراب دا بيصيب واحد من كل 100 شخص في مرحلة ما من مراحل حياتهم، وغالبًا بيصاب بيه الأفراد في مرحلة المراهقة أو بعدها يعني ما بين سن 18 و25 سنة، ونسبة الإصابة بيه بتقل بعد سن الأربعين.
ما هما القطبين؟
الشخص المصاب بالاضطراب دا حالته بتتراوح ما بين القطب الأول وهو الهوس بالأحداث والأشخاص والأشياء حواليه، ويتحمس جدًا أنه يخرج ويقابل ناس ويعمل أنشطة اجتماعية أو رياضية ويمر بحالة انبساط غير عادية بالنسباله، ويتحول لشخص اجتماعي سعيد فعلا ومبتسم وبيضحك، وفي بعض الأحيان الموضوع بيتطرف لدرجة أن المصاب بتجيله خيالات وهلاوس تخليه يعتقد في وجود حاجات أو أحداث مش موجودة لكن دا بيكون رد فعل طبيعي للنشاط الزيادة في مخه، وممكن يتحمس لمشاريع أو لشراء حاجات مش محتاجها.
المصاب مش هيحس أنه بيعاني من أي مشكلة، لكن اللي حواليه هيلاحظوا أن حماسه زائد عن الحد أو أنه غير طبيعي.
والقطب التاني على العكس تمامًا من الحالة الأولى، بالرغم من أن حالته وظروفه والأشخاص الي حواليه ممكن يكونوا ثابتين ومحصلش مشكلة أو أي حاجة تضايقه لكن المصاب بيلاقي نفسه بيفكر في أفكار سلبية زي إنه عديم القيمة ومحدش بيحبه وأن مفيش أمل والحياة سودة قدامه، وممكن يفكر في الانتحار.
ليه أنواع كتير بحسب المدة اللي بتستغرقها كل حالة منهم، ممكن يكون أسبوع وممكن الحالة تدوم بالشهور، وممكن واحدة منهم أكثر من التانية.
يعني مثلا شخص يستمر لمدة أسبوع في حالة نشاط شديد و حابب يشتغل ويعمل حاجات كتير في نفس الوقت، ويبقى متضايق أنه معندوش وقت يعمل كل الحاجات اللي عايز يعملها، وممكن يدخل في مشاريع استثمارية ضخمة غير مضمونة، وبعد الاسبوع دا على طول يدخل لمدة أسبوع تاني في اكتئاب وفقدان الرغبة في كل شيء وهكذا.
الأسباب
العلماء متوصلوش لسبب محدد للإصابة باضطراب ثنائي القطب لكن من الأسباب المقترحة هي الضغط النفسي والعصبي الشديد أو حدوث صدمات نفسية متتالية ومشاكل الهرمونات نتيجة تناول أدوية معينة أو الحمل، وكذلك العوامل الوراثية.
العلاج
في أنواع كتير من العلاج بتبقى على حسب نوع الحالة، في علاج بالأدوية الي بتساعد المريض يحقق نوع من أنواع التوازن في هرمونات الجسم وبالتالي يحقق التوازن في حالته النفسية.
وفي علاج نفسي عن طريق التعامل مع حالات الاكتئاب وحالة الهوس نفسيًا أو العلاج المعرفي الإدراكي بأن المريض يعرف أن عنده مشكلة ويعرف ازاي يتعامل مع الحالة دي لما يحس أنه محبط جدًا أو أنه متحمس جدًا.
