لو معجبة بيه.. إزاي تعبري عن مشاعرك؟
لما بنحس إن اهتمامنا بشخص معين زايد عن باقي اللي حوالينا، مبنبقاش لاقيين تفسير للاهتمام ده، في مننا بيقدر يحدد بسرعة هو ليه مهتم بالشخص ده مقارنة بغيره.
لكن في غيرهم بيفضلوا مش فاهمين لحد ما بيتورطوا أكتر في مشاعرهم، بس في الوقت ده مبيبقوش عارفين مشاعرهم دي يا ترى من طرف واحد ولا من طرفين؟ وهل تصرفات اللي قدامهم بتعبر فعلًا عن اهتمام ولا مجرد معاملة عادية؟
في النقطة دي الولاد بيبقى طريقهم أسهل لإنهم ممكن يصارحوا البنت عادي بمشاعرهم بعكس البنت اللي بتحكمها عادات مجتمع، وعلشان كده «شبابيك» قرر أنه يعرفك رأسك من رجلك بشوية نصائح لو التزمتي بيها هتقدري تعبري عن إعجابك للولد اللي قدامك من غير ما كرامتك تتوجع.
الاهتمام
نجاحك في النقطة دي بيعتمد على مدى جرأتك، بمعنى إنك لو كنتي شخصية جريئة فأنتي هنا هتقدري تحققي النقطة دي بنجاح مقارنة بغيرك اللي عندها مشاكل مع الجرأة.
عمومًا هنا حاولي إنك تهتمي بكل تفاصيل حياته، وشغله، والدراسة، وأحلامه اللي عاوز يحققها؛ لإن الخطوة دي هتميزك عن أي صديقة وزميله في حياته، اعرفي إزاي توصليله إنك دائمًا معاه بجملة «قولي عاوز إيه» مش «لو احتجت كذا قولي»!
الكلام بصيغة الجمع
طالما عاوزه تبينيله حقيقة مشاعرك ناحيته، يبقى لازم تتكلمي معاه بصيغة الجمع لإن ده هيحسسه إنه مش أي حد في حياتك.
غير كده معروف عن البشر عمومًا إنهم لما بيكونوا لوحدهم بيبقى مستقبلهم هو الوحيد اللي شاغل تفكيرهم، ودائمًا كلامهم بيبقى بصيغة الفردية بس لما بيلاقوا نصهم التاني بيبقى الكلام بصيغة الجمع سواءً للولاد أو البنات.
قوليله سر
كل الحاجات اللي بنتكلم فيها لو دققتي فيها هتلاقيها بتدور حوالين إنك تحسسيه إنه مختلف عن غيره، وأكيد محدش هيعبر عن النقطة دي زي إنك تقوليله سر وحتى لو مكنش في الحقيقة سر.
بس كفاية إنك توصليله إنه دونًا عن باقي الناس اللي حواليكي روحتيله هو وحكتيله عن حاجة تخصك، هنا هيحس إنك واثقة فيه ومعزته عندك متتقارنش بأي حد تاني.
متنسيش الحاجات اللي بيقولها
لو حس إن الحاجات اللي بيقولهالك مش محل اهتمام بالنسبة ليكي، ده هيحسسه إنك أصلًا مش مهتمه بيه حتى لو كنتي فعلًا معجبة بيه.
مينفعش تكوني معجبة بيه وعندك مشكلة في النسيان، ولو بتنسي ممكن دائمًا تدوني اللي بيقولهولك علشان لو نسيتي تستعيني بكلام النوتة، وحاولي بأي طريقة إنك تبعدي عن الحاجات اللي لو عملتيها من غير قصد هتلاقيه مش عارف يغفرها.
اعرفي إزاي تحتويه
الاحتواء مش مهمة الرجل الأولى زي ما بتسمعي؛ لإن زي ما أنتي نفسك إنه يحسسك بالإحتواء ده، هو كمان بيتعرض لمواقف بيبقى محتاج احتوائك ليه.
بلاش تفكري في الأنا بمعنى، إيه الصح؟ هل لازم إنتي اللي تحتويه الأول ولا لازم هو اللي يقوم بالدور ده، أو لو أنتي قومتي بدورك على أكمل ده معناه إنك تستني منه الخطوة دي؟.
لا طبعًا في اللحظة دي لما تحتويه متفكريش إيه المقابل اللي هتاخديه منه؛ لإن الإعجاب والحب مبيعرفش هو عمل كذا فلازم اعمل كذا، لازم تعرفي إزاي تكوني عفوية في كل شىء حتى احتوائك.
