مريم سامح تكتب: مبتعرفش تعبر عن مشاعرك.. طب والحل؟!
المشاعر.. من الكلمات اللى بقينا نذكرها كتير مؤخرًا هي وتباعتها (الحب، العشق، الأحاسيس،... الخ) ومعظمنا بيعرف يعبر عن مشاعره بطلاقه خصوصًا لو لحد بيحبه، لكن، الليي مبيعرفوش إيه وضعهم؟!
الناس اللي مبتعرفش تبين مشاعرها، أو مبتحبش تبينها عموما دول ناس بتحس وبتحب مش جماد، بس هما بيواجهوا مشكلة في البوح بمشاعرهم دي في صورة كلام، يعني مبيعرفوش يقولو لصحابهم «إنتو حياتي وأغلى حاجه ..إلخ»
ولا حتى في الحب أي حد بيحب شخص من الناس دي غالبا بيتعب جدا عشان يوصل معاهم لمرحلة أولية طبيعية بين أي اتنين «أسوياء» يعني عشان يقول كلمة «بحبگ» بيعمل مجهود أكبر من أي حد رغم إن كل مشاعره وكيانه بيعشق الشخص دا بس انه يقوله الكلمة دي صعبة عليه.
علماء النفس بيطلقوا عالشخصية دي اسم «الشخصية القهرية» وهي بتتسم بكل الكلام اللي قولناه فوق. بس الحقيقه أنهم مليانين ميزات هما نفسهم بيجهلوها، واعتقد لو الناس عرفت قد إيه الأشخاص دول «صادقين» مستحيل يبعدو عنهم.
الدكتور إبراهيم الفقي، في أحد مقالاته عن الشخصيه بيقول إن الشخصية القهرية بيكون صاحبها صادق جداً مع نفسه ومع غيره، وأنه متقن جدا ومتفاني في عمله ولكنه بيعاني من عدم القدرة على اتخاذ القرارات.
أما عن أسباب امتناعه عن البوح بمشاعره، فهي كتيرة، ولكنها بتدور حوالين بعضها :D زي:
الخوف: احياناً الشخص دا بيخاف يقول لحد انه مهم في حياته فيستغله ويستغل نقطة ضعفه ويستغل حبه ليه وإنه شخص عزيز على قلبه ومبيرتحش إلا معاه.
الفراق: غالبية الناس بتخاف من الفراق بس في الحالة اللي معانا الفراق بيمثله حاجه أكبر بكتير، لأنه عادة ما بيكون شخص مبيألفش أي حد بسهوله ولما يلاقى الشخص اللي بيأنس معاه بيخشى فراقه جدا وبيتأزم فعلا لو حصل دا، واللي غالبا ما بيحصل لأن محدش بيستحمل بخل المشاعر.
فقدان الثقه: صاحب الشخصية القهرية مبيثقش بسهولة في اللي حواليه خصوصا إنه بيكون معروف وسطهم إنه شخص مغرور لانه بيتعامل بحدود، بطبيعة شخصيته، عشان كدا شايف إنه مهما قال محدش هيفهمه فبيفضل السكوت.
الحل إيه؟
أولا... لازم تؤمن تماماً إن دي شخصيتك ومينفعش تغيرها أو تكرهها ولكن تقدر تروضها، بمعنى، إن من عيوب شخصيتك إنك صريح جدا! طب لو دا بيضايق اللي حواليگ اكيد مش هتكدب ولكن هتاخد نفس قبل ما تقول رأيك بحيث توصل الحقيقه بصورة لبقه متزعلش حد.
ثانيا... لو ليك صديق وبتعزه فعلاً وحابب تعرفه دا بس مش قادر فعلا تقوله كدا، هتحاول تعبر عن حبك ليه بإنك تبسطه... يعني لو انت ولد مثلاً حسس صاحبك إنه مهم، خد رأيه في كل حاجه، وعرفه إنه عزيز عليك والولاد أبسط من البنات عموما.
أما لو بنت فممكن هدية بسيطة تعبري بيها عن شكرگ لصاحبتك اللي استحملت منك كتير، هتكفي وزياده وعرفي صاحبتك برضو إن دا آخرك في المشاعر وهي هتفهم دا كويس اووي.
اخواتنا الحبيبة، كان مره واحد بيشتكي إن خطيبته بارده معاه جدا رغم إنه متأكد أنها بتحبه بس هو نفسه يسمع منها اي كلمه، حاول مرة واتنين مفيش أي استجابة، طب والعمل؟
صاحبنا ده قالك مفيش غير إني ادربها، يعني كل يوم أخد منها كلمة حلوة من غير ما اتعمد اعرفها أنها بتقول كلام حب ليا؛ فبدأ يجبلها هديه ويسألها عجبتك تقوله حلوه جداً فيقوم هو رادد قايلها قصدك أنا مبجبش حاجة وحشة، تقوله آه، وهكذا..
هو استخدم ذكائه لأنه متمسك بيها.. أنت أو أنتِ اعملي نفس الكلام هتلاقي ألف حل وطريقه.. بس خليكم عارفيين إن الشخص دا ربنا خلقه كده ممكن يتغير وممكن لأ.
نصيحه أخيرة لأصحاب «الشخصية القهرية»، حاول متجهدش نفسگ في التفكير أو تأنيب ضميرك بصورة مفرطه لأنكم أكثر عرضه للإصابة بالصداع النصفي والقولون العصبي، وأكيد صحتكم أهم.
