6 نصائح عشان تضمن حياة سعيدة
طول ما احنا عايشين بندور على السعادة ولما بنلاقيها بنقول «خير اللهم اجعله خير»، أما غيرنا اللي مبيلقوهاش بتبقى حجتهم الحظ اللي دايمًا باعدها عن طريقهم.
كل الكلام ده غلط وملهوش أساس من الصحة؛ لإن طريق السعادة مفتوح للي عاوز يمشي فيه، أما غيرهم اللي عاوزينه بس مش عارفين يمشوا فيه، فدول عاوزين نقولهم إن خبيرة العلاج بالطاقة الدكتورة حنان زينال قدمتلهم 6 نصائح في برنامج «النهاردة أحلى من نونزي» على موقع «إن كادر» المُذاع على اليوتيوب.
- حب نفسك
حبك لنفسك مش لازم يبقى مجرد شعارات بتقولها؛ لإنه لو بقى مجرد شعارات مش هتعرف تتقبل عيوبك وأي حد هينتقدك في شىء هتضايق منه وتنكد على نفسك من غير ما تعرف تطور من شخصيتك.
بس لو عرفت تحب نفسك هتحط إيدك على العيوب ومهما سمعت مش هتتضايق بالعكس ده هيخليك تعدل أكتر من نفسك علشان تصلح منها، وهنا هتبقى ابتديت أول خطوة في طريق السعادة لإنك ببساطة متصالح مع نفسك.
- بطل تهرب من مشاكلك
لو فاكر إن هروبك من المشكلة هيحلها وهيخليك تعيش حياة سعيدة تبقى غلطان؛ لإن الهروب ده مجرد حل مؤقت عامل زي المسكنات اللي بمجرد ما مفعولها بيروح الألم بيرجع تاني.
وبالتالي هتفضل المشكلة معكرة حياتك ومخلياك مش عارف تعيش مبسوط، بس لو قدرت تقول لنفسك «أنا عندي مشكلة كذا وهعمل كذا علشان احلها» هنا ممكن تلاقي حواليك ناس حابة تساعدك، ولو ملقتش عادي حاول تحل لوحدك بس المهم إنك متهربش علشان متطلعلكش فجأة وتبوظ حياتك من تاني.
- الماضي انتهى
إزاي نفسك تعيش حياة سعيدة وأنت لسه موجود بين ذكرياتك القديمة، لازم تقول لنفسك إن الماضي انتهى بس الحاضر جاي، وسواء كان اللي هيجي معاه سلبي أو إيجابي فده مش مهم؛ لإن مينفعش تتوقع السلبيات وأنت بتدور على السعادة.
خليك وإنت بتبص للحاضر متفائل؛ لإنك لو كنت متشائم مش هتعرف تشوف من اللي جاي أي حلو، وهيبقى اللي جاي زي اللي راح، ولو غلط زمان كان كتير انساه وأبدأ من تاني علشان متستمرش في الغلط.
- ابعد عن الكمال
مهما البشر حاولوا يوصلوا لمرحلة الكمال فده هيكون مستحيل لأن الكمال لله وحده بس البشر بتغلط ولازم تغلط علشان تتعلم من غلطها.
تخيل كده حياتك من غير غلطات هتبقى مستحيلة، وعمرك ما هتتعلم منها حاجة، والدليل على كده ما ذُكر في أحد الأحاديث عن «كل بني آدم خطاء وخير الخطائين التوابون».
وعلشان كده بطل تكون جلاد نفسك بس متخليش الغلط مباح في أي وقت، حط لنفسك قواعد وامشي عليها ي زي ما هي ولما تغلط اتعلم ومتنكدش على نفسك.
- بلاش الناس المُرهقة
ليه تفضل مستمر في علاقة مع حد بيرهقك، الناس دي ابعد عنها فورًا قبل ما يحولوا حياتك لجحيم.
ببساطة؛ أيه الحكمة من تعاملك مع حد بيدخل في اللي بيخصه واللي ميخصهوش، أو غيره من اللي بيفرض نفسه عليك أو اللي بيكسروا كل القواعد وبيحاولوا يكرهوك في شخصيتك لإنهم مرضى.
علشان كده لما تلاقي نفسك وأنت بتتعامل مع أشخاص بتفكر كتير وبتحسب الكلمة قبل ما تطلع، وإزاي هو هسيتقبلها بلاش خالص منهم.
- متبصش للعقبات
التفكير في العقبات مش هيخليك تتحرك خطوة قدام، يعني مثلًا لو نفسك تدخل كلية معينة بس مصاريفها غالية عليك، أو إنك نفسك تتقدم لبنت بس مش معاك فلوس كافية لمصاريف الإرتباط والجواز.
أحب أعرفك إنك هنا هتفضل تلف في نفس الدايرة من غير ما تطلع بنتيجة بس لو خليتك إيجابي شوية ودورات على حلول علشان تتغلب على المشاكل دي هتلاقي، مثلًا الحالة الأولى بتاعة المصاريف هتتحل بإنك تشترك في منصات التعليم الإلكترونية زي «رواق» و«إدراك» هتعلمك ببلاش وبشهادة كمان.
التاني بقى إنك تشتغل في أي حاجة، المهم تجيب مصاريف علشان تحقق حلمك، من الآخر كل حاجة هتتحل لو أنت عاوز.
