7 عبارات متقوليهاش لصاحبتك السنجل
معظم البنات في مجتمعنا بتتعرض لضغوط كتير خاصة بعادات وتقاليد اخترعناها علشان نعقد حياتنا، بس مهما كانت صعوبة الضغوط دي البنات بتقدر تتحمل وتواجه أي حاجة إلا مشكلة واحدة بس.. «الجواز».
وبدل ما اللي حواليها يساعدوها إنها تعيش حياتها لحد ما الخطوة تتحقق، تلاقيهم بيزودوا وجعها بما فيهم أعز أصحابها.
وعلشان كده «شبابيك» بيقولك حبي صحبتك وخافي عليها براحتك، بس اعرفي إزاي متوجعيهاش وابعدي في كلامك عن العبارات دي.
مفيش جديد في حياتك؟
الجملة دي أي بنت ممكن تستحملها من الناس المتطفلة حواليها، بس اللي مينفعش، إنها تسمعها من صاحبتها!
بلاش كل شوية تقوليلها إيه الجديد، لإنها لو هتعرف تعديها مرة والثانية مش هتقدر في الثالثة، وفي الوقت ده بدل ما صاحبتها تكون هي اللي بتطبطب هتبقى هي مصدر الوجع، عمومًا لو كان في جديد كانت عرفتك بيه أول واحدة.
كيف تصطادين عريسًا؟
أنا واثقة إن ربنا هيكرمك
طبعًا ربنا كرمه فوق أي حاجة، بس ليه كل شوية تسمعيها الجملة دي؟ على فكرة هي ممكن تكون مش حاطة الموضوع في دماغها وكلامك يحسسها إن في حاجة مش مظبوطة.
لازم تعرفي إن مش معنى إن نصيبها اتأخر شوية إن الحياة هتقف، لا هي مستمرة ومبتقفش على حد، بس بلاش أنتي تهولي الموضوع في دماغها وتكبريه.
بلاش تفكري كتير ونصيبك هيجيلك
مين قال بس إنها بتفكر كتير، وحتى لو بتفكر كتير كلامك ده هيخليها تفكر أكتر وهيجي معاها بالعكس.
علشان كده لو في وقت من الأوقات حسيتي إنها مهتمه بالموضوع، ابعدي عن الكلام اللي بيدايق زي بلاش تفكري ده لإنه هيحسسها إنها فيها مشكلة، خليكِ دائمًا الصاحبة اللي بتعرف تحس وتوزن كلامها قبل ما تقوله.
مفيش أجمل من السنجل اسأليني أنا
ليه كل شوية تقوليلها يا بختك أنتي مريحة دماغك وفي حرية، اسأليني أنا؟ لازم تعرفي إن زي ما الإرتباط ليه مشاكل، عدمه كمان ممكن يعمل مشاكل.
ياريت متفكريهاش كل شوية إنها مش مرتبطة، متخنيقهاش منك وخلي الكلام ده للأغراب اللي بيتطلفوا على غيرهم من غير أي إحساس.
للولاد.. 5 نصائح عشان متخسرش صديقاتك
يا بختك بتعرفي تخرجي براحتك
إيه فايدة إنك تقوليلها كل شوية يا بختك بتعرفي تخرجي؟ خلاص هي عرفت إن خطيبك بيضايقك في الخروج ومانعك من بعض أصحابك بس أنتي مبسوطة بكده وراضية.
يبقى ليه بقى كل شوية تحسسيها إنك مضايقة ويبقى الظاهر هو إنك مضايقة والباطن إنك بتفكريها بأنها مش مرتبطة؟
ليه دائمًا بترفضي اللي بيتقدمولك؟
مينفعش تبقي صاحبتها ومش عارفه دماغها، أكيد لما بتقولك سبب معين يبقى حقيقي لأنك لو مش قريبة منها بجد مش هتعرفي أصلًا إن في حد.
ولو بجد يهمك إنها ترتبط، اعرفي أسبابها ولو كان في حاجة زي إنها متعقدة أو عندها فوبيا من الجواز، حاولي تسعديها دائمًا بكلامك ووجودك، بلاش تبقي إنتي كمان مصدر ضغط.
عندي ليكي عريس هعرفك بيه قريب
قبل ما تقولي جملتك لازم تبقي عارفة كويس رد فعلها؛ لإن ببساطة هي ممكن تقولك لا، بس من جواها تحس قد إيه إنها كبرت أو إن الموضوع يعملها مشكلة نفسية متعرفش تعديها بعد كده.
ولو هي كانت مرنة وواقفت بس محصلش نصيب بينهم أو متقابلوش من الأساس، ده بردوا هيأثر عليها جامد فبلاش تطوعي بجملة زي دي خالص.
