طريقك لحياة زوجية سعيدة
كتبت- ميرال عزت
جوازات كتير بتفشل بسبب الملل والروتين، وطبعاً المشاكل الزوجية اللي ملهاش نهاية، وخصوصاً في السنه الأولى من الزواج، وده بسبب اختلاف طباع الزوجين، فلو عاوزة تعرفي إزاي تتخلصي من مشاكلك الزوجية اقرأي التقرير ده.
كل الحكاية أنك محتاجة تعرفي إزاي تتعاملي مع شريك حياتك، علشان كده «شبابيك» بيقدملك مع مدرب التنمية البشرية هيثم حسني، 4 عوامل تجعل حياتك الزوجية أفضل.
دائماً بتحصل خلافات بين الزوجين، بعضهم بيقدر يتعامل مع المشاكل دي ويحلها، وبعضهم مشاكله بتتطور وممكن توصل للطلاق، فأكيد الموضوع محتاج صبر من الطرفين ولكن فى أساسيات لو اتبعوها مشاكلهم هتقل.
- متعنديش معاه ولا تجادلي
سيدات كتير مبتقدرش تمتص غضب زوجها بالعكس بتعند معاه وبتكبر المشكلة، رغم إنها لو سكتت بس الأمور هتهدا، و ده بيحصل لأنها مقتنعة إنها لو وافقته على كل حاجة مش هيبقلها رأي بعد كده، حتى لو الزوج كان صح، رغم إن ربنا سبحانه وتعالى أمر الزوجة بطاعة زوجها، يعني لو بس طاوعتي زوجك هتقل مشاكلك.
- اسمعي جوزك ومتعيرهوش
أزواج وزوجات كتير مفيش بينهم حوار، ومبيسمعوش بعض ولا بيتناقشو وده بيسبب نوع من الخرس الزوجي، لكن لو كل زوجة اتكلمت مع زوجها وسمعته وخلقت حوار، هتفهمه أكتر وهتعرف هو بيفكر إزاى وطبعا المشاكل هتقل.
بعض الزوجات في خلافاتهم الزوجية بيعايروا اجوازهم بأحداث قديمة مثلا بأنه كان مرتبه قليل أو كان ساكن فمكان على قده وأمور تانية، وهى فاكرة إنها بكده بتعرفو إنها اتنازلت واتجوزته رغم إنها أفضل منه، إلا انها مش عارفة إنها بتدمر علاقتهم وبتحسسه بالنقص.
- متقارنيهوش بحد
عادة الزوجة المصرية وقت خلافتها مع زوجها بتبدأ تقارن بينه وبين والدها أو زوج أختها أو حتى زوج جارتها إللى بيعملها أحسن معامله، رغم إنها مش عايشة معاهم ولا تعرف الأزواج التانيين بيتعاملوا إزاي، والأمور دي طبعا بتضايق الزوج وبتزيد من حدة المشاكل بينهم، وفي بيوت كتير بتتهدم بسبب المقارنة دي.
- افصلي بين مرحلة الخطوبة والزواج
كل بنت قبل الزواج وخاصة في فترة الخطوبة بتبني لنفسها أحلام بأنها هتكون ملكة في بيتها، ومفيش مشاكل هتحصل أبدا مع زوجها، لأنه هيفضل يعملها بحب وحنان زي فتره الخطوبة، إلا أن بعد الزواج بتتصدم في الواقع الزوج على طول مشغول ولما بيرجع البيت مبيقدرش حتى يتكلم معاها وده طبعا بيضايق الزوجة ومن هنا بتبدأ المشاكل.
وفي النهاية نصح مدرب التنمية البشرية هيثم حسني كل زوجة باتباع التعليمات السابقة عشان تتجنب مشاكل وخلافات كتير كانت ممكن تحصل.
