5 عادات لو حافظت عليها حياتك هتتغير للأحسن
دايما بنحلم نغير حياتنا للأحسن بس مبنبقاش عارفين الطريقة الصح للي عاوزينه، وبالتالي لما بنتعرض ليأس بنرجع لورا ألف خطوة، في الوقت اللي غيرنا بيقابل مشاكل كتير وبيصمم أنه يكمل.
علشان كده قبل ما تسأل إيه اللي المفروض اعمله علشان حياتي تبقى أفضل، حط قدامك هدف وأمسك فيه علشان تطبق الخطوات اللي «شبابيك» هيقدمهالك دلوقتي.
- نظم مواعيدك
طالما حاطط في دماغك هدف لازم أول حاجة تبدأ بيها علشان تحققه هو تنظيم المواعيد، النقطة دي مش بس هتساعدك في إنك تعيش حياتك صح لا دي هتخلي إحساس الملل ميقربش منك.
لإن ببساطة تقسيم الوقت هيشغل يومك بشكل صح، أما بقى لو مواعيدك مش منظمة فاللي أقدر اقولهولك إن حياتك هتفضل محلك سر ومش هتتقدم خطوة واحدة.
- متنساش الرياضة
الرياضة مش مجرد ترفية زي ما أنت فاكر لإن ممارستها بيحمي جسمك من أمراض خطيرة زي ضغط الدم والسكر والقلب، ده غير إنها بتعلمك الصبر.
الموضوع مش محتاج منك وقت كبير علشان تمارسة، كل الحكاية تنظيم مواعيد مع تحديد سبع دقايق كل يوم الصبح وهتلاقي الدنيا فرقت معاك.
- افطر كويس
دائمًا بنسمع من الدكاترة عن أهمية وجبة الفطار بس للأسف مبنفذش حاجة، ولو نفذنا بنأكل حاجات مش صحية بتضر جسمنا وبتخلينا مش قادرين نكمل يومنا.
علشان كده وقبل ما تأخد الكلام بهزار، اعرف إزاي الوجبة دي بتحمي جسمك من البدانة، وبتزود من تركيزك خلال الدراسة والعمل.
- خطط لحياتك
من المهم جدًا وأنت بتحاول تغير حياتك للأحسن، إنك تخطط لكل حاجة بتعملها، بمعنى أوضح إيه اللي هتعمله في يومك وإزاي هيمشي، إيه هي أولوياتك؟.
متنساش كمان إن الخطوة دي هتخليك تستمتع بحياتك، وده هيخلي وقت الجد جد ووقت الاستمتاع استمتاع.
- راجع يومك
قبل ما تنام كل يوم، خصص 10 دقايق تسأل فيهم نفسك إنت نفذت اللي مطلوب منك النهاردة ولا لا؟ ولو لا اعرف السبب علشان أيامك تبقى مختلفة.
بس قبل ما تعمل الخطوة دي، لازم تتأكد من إيمانك بالحاجة اللي بتعلمها لإنك لو مقتنع إنك هتفشل يبقى المجهود ده ملهوش لزمة، أما لو مقتنع استمر في المعافرة لحد ما توصل.
