اتلحلحي شوية.. حاجات تخليكي لبلب في الكلام مع خطيبك
اتخطبتي ولقيتي نفسك واقعة في مشكلة إنك مش عارفة تفتحي مواضيع مع خطيبك وحاسة إن ده ممكن يزهقه منك. متقلقيش في الموضوع هنقولك إزاي تكوني لبلب في الكلام معاه ?
اسأليه
اسأليه عن نفسه بيحب إيه وبيكره إيه وأحلامه إيه ومواقفه الكوميدية في المدرسة :D ، وإجاباتوا ليكي هتحمسك إنك تفتحيلوا قلبك أكتر وتتكلمي معاه عن حياتك.
اهتماماته
أي حاجة بيهتم بيها اهتمي بيها لأن كل ما إهتميتي بإهتماماته كل ما عرفتي إزاي تلاقي مواضيع تتكلمي معاه فيها ومش بس كدة. اعرفي عنها شوية معلومات وأخبار أول بأول.
يعني مثلًا لو بيهتم بكرة القدم اقري عن اللعبة كتير عشان تتكلمي معاه فيها وتقوليلوا «بس إيه رأيك في حارس مرمى كذا؟» وكده يعني وهتلاقيه عينوا لمعت من كتر ما لقى حد بيشاركه حبه للعبة اللي بيحبها.
وطبعًا منقدرش ننسى البلاي ستيشن اللي لو بيحبه يبقى جتلك الفرصة لحد عندك إنك تتعلميه وتقوليلوا يلا بقى نلعب ماتش عشان أكسبك.
موضوع للمناقشة
إفتحي معاه أي موضوع للمناقشة في أي مجال سياسة، فن، رياضة، ثقافة وخدي وإدي معاه في الكلام بسلاسة يعني الموضوع ميبنش إنه سؤال وجواب، لأ خلي في أريحية في الكلام بينكوا.
إقترحي عليه لعبة
وإنتوا قاعدين مع بعض إقترحي عليه إنكوا تلعبوا لعبة بحيث تتسلوا وتتكلموا مع بعض زي مثلًا لعبة لف الإزازة اللي هى بتلفيها وأول مايجي بوزها ? في وشه يبقى هو اللي يسأل وهكذا وفي اللعبة ديه هتلاقي الكلام بينكوا بيجر بعضه :)
خروجات مطرقعة
اقترحي عليه خروجات مجنونة مختلفة تخروجوا فيها وتطلعي الطفلة اللي جواكي اللي بتحب تتكلم وترغي وتفرح لأن المكان هيكون ليه عامل إنه يخرجك من صمتك ده يعني مثلًا ممكن تقترحي عليه مكان اسمه Trapped Egypt.
وده مكان عبارة عن 4 أوض وهما زنزانة الموت والمدفن والحجر الصحي وBunker 38 وكل أوضة ليها قصة مختلفة عن التانية وهتعيشوا فيها مغامرة مدتها 60 دقيقة.
في النهاية بقى عايزة أقولك
ده خطيبك اللي هيكون جوزك في المستقبل واللي لازم تكون روحكوا إنتوا الإتنين مولفة على بعض متتكسفيش منه إفتحيلوا قلبك :)
