متصعبش الأمور على نفسك.. 7 طرق هتغير حياتك
بتحس دايمًا أن عندك شغل كتير ومش هتلحق تخلصه؟ حاسس أنك مضغوط ومجهد طول الوقت؟ مفكرتش أنك ممكن تكون بتصعب الأمور على نفسك؟
لو شايف إن حياتك معقدة وفيها تفاصيل كتير زيادة عن اللزوم، وحاجات مضايقاك.. الطرق دي ممكن تساعدك تبسط حياتك.
- اتعلم تقول لأ
جرب تقول لأ للناس والحاجات غير الضرورية في حياتك، وهتلاقي إن الحاجات المهمة بس هي اللي هتفضل موجودة، وأنك هتستريح من جزء كبير من المشاكل اللي كنت بتورط نفسك فيها.
لو مش هتقدر تقابل صحابك قولهم لا، لو مش هتقدر تقوم بمهمة معينة قول لأ، الموضوع قد يكون صعب في البداية، لكن بمجرد ما تحس بالراحة من أنك معملتش حاجة مش عايز تعملها، هتتعلم تفكر كويس قبل ما توافق على أي حاجة.
- قرر
لو عندك حاجات كتير لازم تاخد فيها قرار، وبتفضل تأجل القرار دا لحد أخر وقت، جرب تنهي الموضوع بأنك تقرر هتعمل إيه بالزبط.
التأجيل بياخد مساحة كبيرة من دماغك وتفكيرك، زي ما يكون صناديق بتتحط فوق بعضها، وأنت فاكر أنها مش هتأثر عليك، لكن وجودها في حد ذاته حتى لو في خلفية التفكير في أي حاجة تانية، هيخليك تحس أن وراك حاجات كتير عايز تفكر فيها وتفضل متوتر ومتعصب على طول.
- نظف بيتك
اتخلص دايمًا من الحاجات اللي مش محتاجها في البيت، زي الهدوم أو الكتب أو أي كراكيب تانية كل الي بتعمله أنها بتكوم تراب فوقيها وبتشغل حيز كان ممكن يتحط فيه حاجات أنت محتاجها.
خلي المكان اللي انت قاعد فيه مفيهوش غير الحاجات الضرورية بالنسبالك واللي انت فعلا بتحتاجها، الحاجات التانية ممكن تتبرع بيها أو تتخلص منها، المهم أنها متفضلش حواليك.
- سيب موبايلك
الموبايل بقى حاجة مهمة جدًا دلوقتي، لأنه مش بس موبايل دا كومبيوتر وكاميرا ومنبه وكشاف، جهاز إلكتروني كامل وبيساعدك في كل حاجة تقريبا.
لكن لو بتقضي وقت كتير ماسك الموبايل من غير ما تكون محتاجله فعلا، وإنما بتضيع وقت مش أكتر، دا هيعملك مشاكل كتير زي أنك تنام متأخر، أو يجيلك أرق أو تخلي علاقاتك كلها مقتصرة على الشاشة دي، واصدقاءك بتبعتلهم رسايل، وأهلك بتبعتلهم مقاطع صوتية، وقرايبك بتقولهم كل سنة وانتو طيبين على فيس بوك! دا غير أنه هيبوظ علاقتك باللي حواليك، فهو هيسببلك حالات ضيق شديدة، تخليك تحس أنك لوحدك وأن الناس دي فعلا مش موجودة في حياتك.
جرب تسيب الموبايل شوية وتبص حواليك. أسباب إدمان «فيس بوك» وكيف تتخلص منه؟
- النظام
لما تكون حاطط حاجاتك في مكانها، هتلاقيها بسهولة لما تدور عليها، مش هتحتاج تقضي نص ساعة بتدور.
نظم وقتك والمكان اللي حواليك والحاجات والمهام اللي عايز تعملها، حاول تحدد أماكن للحاجات بتاعتك وتحطها فيها، خلي الكتب منظمة عشان تطلع الكتاب اللي انت عايزه بسهولة، وخلي الدولاب مرتب عشان شكله وهو مش مترتب بيأثر على نفسيتك.
كيف تتخلص من عاداتك السيئة؟
- وزع المهام
لو عندك حاجات كتير ومحتاج مساعدة، اطلب من اللي حواليك يساعدوك لو دا ممكن.
اختار الأشخاص اللي ممكن يساعدوك فعلا، بغض النظر عن نوع المساعدة، فإنك توزع مهامك هيفيدك كتير في الشغل أو الدراسة أو الأعمال المنزلية وغيرها.
- قدر اللحظة الحالية
متفكرش كتير في الحاجات اللي لسه محصلتش ولا الحاجات اللي حصلت وانتهت خلاص، ركز على الوقت الحالي بس.
لأن اللحظة الحالية هتبقى في يوم من الأيام جزء من الماضي، فاغتنمها قبل ما تعدي وانت بتفكر في حاجات تانية.
المصدر: 1
