لم فلوسك.. اشتري من «الهايبر» من غير ما تخرم الميزانية

لما بتنزل تتسوق من أي هايبر بترجع البيت ومعكش ولا مليم وطبعًا الميزانية بتخرم معاك. بس إيه رأيك بقى إنك تقدر تشتري اللي أنت عايزه وميزانيتك متخرمش، معادلة صعبة مش كدة؟

متهيألك. تعالى أقولك إزاي من خلال الموضوع ده المترجم من موقع «Life hack».

اعمل لستة

قبل ما تنزل السوق اعمل لستة واكتب فيها عايز تجيب إيه والميزانية اللي أنت حاططها للحاجة دي، وإيه الأماكن اللي عايز تشتريها منها وامشي على اللستة دي بحذافيرها.

تأكد من الأسعار

قبل ما تاخد أي حاجة اتأكد من سعرها كويس لأنك في الغالب بتنسى وتقعد تجيب حاجات من غير ما تبص على سعرها ولما توصل للكاشير تلاقي الفاتورة طالعة بالشيء الفلاني.

بص على الخصومات

أي هايبر بيعمل خصومات بس مش معنى كدة إنك تشتري الحاجات كلها اللي عليها خصم. لأ اختار الحاجات اللي انت فعلًا محتاجها عشان متجبش حاجات مش محتاجها وتلاقي فلوسك خلصت وطبعًا لازم تتأكد من تاريخ صلاحية الحاجة اللي هتجبها.

متشتريش وانت جعان

وانت جعان نسبة السكر في الدم بتقل، وفيه دراسة بتقول إن لما النسبة دي بتقل الناس بتصرف فلوس أكتر على الأكل بنسبة 70% وبتشتري أكل غير صحي بأسعار غالية جدًا وعشان كدة كل أي حاجة قبل ماتروح تتسوق.

خزن توفر

فيه حاجات كدة وأنت بتشتريها بينفع إنها تتخزن زي مثلًا البطاطس والعدس والفول والبطاطا والخضروات فممكن تجيب منها كميات وتخزنها وده هيوفر عليك فلوس كتيرة لأنك بدل مثلًا ما تشتري في كل مرة تنزل فيها بطاطس لأ ده أنت هتبقى مخزنها عندك بكمية.