لو متقدملك دكتور.. 8 أسباب حلوة تخليكي تقبليه
متقدملك دكتور ومحتارة تقابليه ولا لأ، علشا واخدة فكرة إن بتوع طب حياتهم كلها شغل ومش بيرفهوا عن نفسهم؟ شيلي الفكرة دي من دماغك خالص لأننا هنقولك على أسباب حلوة تخليكي تقابليه.
والأسباب دي جزء منها مستوحى من موقع Storypick والجزء التاني نصايح من «شبابيك» :)
مستمع بدرجة جيد جدًا
عمره ما يقطع كلامك أبدًا لمجرد فرض وجهة نظره عليكي لأنه بيحب يسمع اللي قدامه كويس جدًا فلما تتكلمي معاه في موضوع هيسمعك ويستنى لما تخلصي ويبتدي يتناقش معاكي.
ملتزم في علاقته معاكي
دراسة الطب زي ما أنتي عارفة دراسة طويلة محتاجة واحد يكون شاطر عشان يقدر يوصل للقب دكتور والشطارة محتاجة إلتزام.
والإلتزام ده هو اللي هيتبعوا معاكي في العلاقة، وهيكون متمسك بيكي لأقصى درجة ومش هيستسلم غير لو لا قدر الله حصل حاجة بعدتكوا عن بعض.
عمره ما يقرف
لو حكيتي ليه إنك بطنك كانت وجعاكي ورجعتي إمبارح بليل أو إنك عندك حساسية في جلدك. عمره ما يقرف أبدًا منك لأنه شاف من ده كتير بحكم دراسته وشغله.
مستقر ماديًا
الدكاترة بيكونوا مستقرين ماديًا وده طبعًا شيء مهم في بناء البيت بتاعكوا بس مش معنى ده إنك توافقي عليه لمجرد إنه مستقر ماديًا لأن الفلوس مش كل حاجة ولكن دي ميزة إضافية.
عنده حكايات كتيرة
بحكم شغله قابلته حكايات ومواقف كتيرة جدًا منها المأساوية ومنها الكوميدية فهتلاقيه بيحكي ليكي قصص كتيرة وده هيخلي القاعدة معاه ممتعة مش مملة.
كشف ببلاش
أي حاجة تعباكي هتلاقيه بيكشف عليكي على طول وببلاش وده طبعًا شيء عظيم ?
حياة صحية
هيبقى أكل البيت في المستقبل كله صحي في صحي وده بحكم إنه دكتور والصحة مهمة عنده قوي وطبعًا ده هيساعدك إنك تعيشي حياة صحية بدون دهون زيادة.
مش ضد مستقبلك
لو عايزة تشتغلي وتحققي حلمك هو مش هيقف قصاد ده لأنه هيكون مقدر قيمة الشغل كويس وعارف إحساس الواحد اللي نفسه ينجح ويوصل لهدفه.
