اتعرضت لموقف محزن؟.. اتعلم الدروس دي

بنتعرض لمواقف محزنة في حياتنا زي مثلًا موت حد، والمواقف دي بتأثر في روحنا جامد ومش بنعرف نطلع منها غير بعد وقت وحتى لو طلعنا بتفضل برضه مأثرة جوانا. لكن في الموضوع ده هنخليك تطلع منها بدروس مستفادة.

تقوية علاقاتك

موقع «Life hack» بيقولك إنه لما يحصلك موقف محزن هتعرف مين أصحابك اللي بجد اللي هيوقفوا جنبك ومين أصحابك الفستك اللي مش هيعبروك.

أصحابك اللي بجد اللي ممكن تكون مبتشفهومش كتير، بس في الموقف اللي حصلك ده لقيتهم كلهم حواليك.

وفي اللحظة دي هتتعلم إنك تمسك فيهم جامد وهتقوي علاقتك بيهم لأنك هتلاقي سند يدعمك في أي موقف محزن يحصلك بعد كدة.

ذكريات كتيرة

لو مات حد عزيز عليك بتفضل فاكر ذكرياته معاك وبتشوف إنك كان لازم تبني معاه ذكريات أكتر وإنك مشبعتش منه، وده هيخليك عايز تعمل ذكريات أكتر مع كل اللي بتحبهم عشان الذكريات دي هى اللي هتهون عليك حياتك في حالة فقدهم في أي لحظة.

فلوس للطواريء

لما يحصلك حاجة وتروح المستشفى ويكون مش معاك فلوس وتبقى مش عارف تعمل إيه وتحاول تتصل بأي حد تستلف منه، هتتعلم من ده بعدين إنك تكون عامل ميزانية فيها جزء للطواريء ولو حصلك حاجة بعدين تكون مطمن إنك معاك فلوس.

روحانيات

أي موقف محزن بتتعرض ليه اتعلم منه إنك تلجأ لربنا دايمًا لجوء دائم مش وقتي للدعاء بس لأنه هو الوحيد القادر إنه يصبرك ويحسن روحك. كمان الجأ لجلسات التأمل اللي عليها دور في إنها تخليك كويس.