إزاي تتعامل بعد صدمة «مبحبكش»؟
لما قلوبنا بتدق لحد مبتعرفش هي رايحة فين ولا هتمشي إزاي، كل اللي بتبقى مركزة فيه إنها طايرة لفوق في السماء ومش عاوزه تنزل تاني.
بسبب ده أحيانًا بنتعرض لرفض في الحب، لإننا ببساطة مشينا ورا قلوبنا اللي محاولتش تتأكد من مشاعر الطرف التاني، ولما بتعرف الحقيقة عقلها بيبقى رافض اللي سمعه مع إن النصيب دائمًا هو الأجمل، عمومًا الموضوع مش صعب لو إنت التزمت بـالست نصائح دول.
- توقع الرفض
مهم جدًا قبل ما تفكر تصارح البنت بحبك ليها، إنك تكون متوقع الرفض اللي مش لازم يكون حصل عشان عيب معين فيك، كل الحكاية إن ممكن تكون كانت بتعاملك كصديق مقرب وإنت فهمت تصرفاتها غلط.
وممكن تاني تكون حاولت توصلك بكل الطرق إنها مرتبطة أو مبتفكرش في الوقت الحالي وإنت مكنتش عاوز تأخد بالك، أيًا كان اللي حصل حاول إنك تكون متوقع ده لإن ده هيوفر عليك طريق تعب نفسي طويل إنت في غنى عنه.
- اعرف السبب
في ناس هتلاقي إن الخطوة دي أصعب من اللي قبلها بحجة الكرامة اللي هتمنعهم من ده، بس في الحقيقة معرفة الأسباب دي هتخلي عقلهم يهدأ من كتر التفكير اللي هيحصل بعد كده.
ده غير إنها هتساعدهم في حياتهم بعد كده خصوصًا لو كان سبب الرفض ده عيب معين في الشخص ده زي إنه «كذاب- بخيل- عينه زايغة.. إلخ».
- اتحكم في فترة حزنك
أكيد مفيش أسوأ من الإحساس اللي ممكن تحس بيه لما تلاقي حبك مرفوض من حد بتحبه، مش هقولك متزعلش.. طبعًا من حقك إنك تزعل وتأخد فترة مع نفسك.. بس لحد متى؟
مهما طالت الفترة إنت الوحيد اللي هتكون مضرور؛ لإن ببساطة الشخص التاني ده عايش حياته وإنت أصلًا مبتجيش على باله، علشان كده حاول تعيش حياتك وقولها إن الرفض مش معناه مشكلة فيك قد ما نصيب في الأول والآخر، وأكيد هيجي اليوم اللي هتلاقي فيه حد يكمل حياتك.
- اتكلم مع صديق مقرب
لو فاكر إن التنفيس عن إحساسك ده هيتعبك أكتر فأنت غلطان، بس لازم تتأكد الأول قبل ما تعمل الخطوة دي من الشخص اللي اختارته؛ لإنه ممكن يخليك تندم على اللحظة اللي قررت فيها تتكلم معاه.
كل لما يكون الشخص اللي اختارته فاهم شخصيتك وعارف تصرفاتك من غير ما تبررها؛ ده هيساعدك أوي إنك متتعبش وإنت بتتكلم أو حتى تبرر لإنه فاهم وحاسس بيك أكتر من أي حد.
- فكر في عيوبه
معروف إن الإنسان لما بيحب بيبقى مش شايف أي عيوب في الطرف التاني، كل اللي بيبقى شايفه منه مزايا وبس، أما العيوب فبيعرف يلاقي ليها مبررات كتير.
مش بقولك تخلي صورته وحشة قدامك بس تشوف الحقيقة، حاول تقلع النضارة اللي كنت بتداري بيها أي عيوب وفكر لو كنت هتقدر تكمل معاه بالشكل ده ولا؟ واحدة واحدة هتشوف عيوب أكتر وهتعرف أنه أصلًا مكنش ينفعك.
- بلاش «داوني بالتي هي الداء»
المبدأ ده هيضرك ومش هيفيدك زي ما أنت متوقع؛ لإن ببساطة إنت بتحاول تنسى بني آدمة ببني آدمة تانية، وهنا إنت مش بس هتظلم إنسانة ملهاش ذنب إنها حبتك وكانت فاكراك إنت كمان بتبادلها نفس الشعور.
لا إنت كمان هتظلم نفسك وخصوصًا لما تفوق من الغلطة اللي ارتكبتها في حق نفسك، غير كده بقى لو اللي حواليك حس إنك بتحاول تدخل نفسك في أي علاقة لمجرد النسيان هيبعدوا عنك وهتتعرض لرفض مستمر مش واحد بس.
