نوستالجيا.. أغاني من التسعينات متتنسيش

فترة التسعينات كانت مليانة بأغاني حلوة كتير محفورة لحد دلوقت في ذاكرتنا وكل ما نسمعها بنحس بنوستالجيا لذكريات الفترة ديه. والحقيقة الواحد مايعرفش سبب ده راجع لإيه يمكن تكون صدق الكلمات أو اختيار الألحان اللي تلمس الروح أو أصوات المطربين والمطربات المتنوعة واللي كل واحد فيهم ليه نبرة صوت مميزة عن التاني ومخلياه ليه طلة وهو بيغني بتأثر في نفوس الناس.

كل واحد مننا صحيح هيختلف على السبب لكن مشهنختلف أبدًا على ان الأغاني ديه أسعدت وبتسعد جيلنا كل لما نسمعها فتعالوا نفتكر مع بعض أبرز أغاني التسعينات طبعًا مش كلها لأنها كتيرة جدًا بس احنا حبينا نفكرك ببعضها عشان تستعيد ويانا الذكريات الجميلة :). 

على بالي

الأغنية ديه أول لما نسمعها وخصوصًا لما بنكون برا مصر بنفتكرعلى طول كل حبايبنا اللي بعدتنا عنهم المسافات. والحقيقة «عايدة الايوبي» حفرت الأغنية ديه في روح كل من سمعها وده راجع لصدق الكلمات وعذوبة صوت عايدة. أغنية على بالي صدرت سنة 1991 وكانت من ضمن ألبوم يحمل نفس اسم الأغنية. 

كل البنات بتحبك

«حسام حسني» خلى البنات كلها تتمايل على أغنيته "كل البنات بتحبك كل البنات حلوين طبعًا ياسيدي يا بختك" اللي كانت من إنتاج سنة 1991، واللي سمى ألبومه بأسمها لأنها كانت مسمعة مع كل الناس في الفترة ديه جدًا وأي حد كنت تقابلوا تلاقيه بيدندن الأغنية. 

داري رموشك

«علاء عبد الخالق» خلى كل بنت تركز في رموشها وفي جمال عينها وقت ما غنى ليها وقالها «داري رموشك عني وداري داري ليه بتحبي تزيدي في ناري». الأغنية ديه كانت من ألبوم "هتعرفيني" اللي تم إصداره سنة 1991.

الغربة

«إسماعيل البلبيسي» في الأغنية ديه قلب المواجع على كل واحد داق مرارالغربة لما قال «أنا من البداية يا غربة بتحمل وخلاص كفاية صعب إن أنا أكمل». أغنية الغربة كانت من إنتاج "صوت الدلتا" وتم اصدارها سنة 1993، وكانت من ألحان البلبيسي برده، وكلمات عنتر هلال وتوزيع طارق مدكور، وكانت من ضمن أغاني ألبومه الوحيد "شاهدين".

مش نظرة وإبتسامة

«سيمون» في الأغنية ديه ادت وصفة سحرية للولد اللي عايز يكسب قلب بنت لما قالت ليه «مش نظرة وابتسامة مش كلمة والسلامة دي حاجات كتيرة ياما لو ناوي تحبني». الأغنية ديه كانت من إنتاج 1996 وكانت من ضمن ألبوم «في حاجة كدة».

الأغنية ديه غناها «طلعت زين» في كليب راجعين لعمرو دياب، وكانت من إنتاج سنة 1995، وده كان أول كليب عربي يتم تصويره على طريقة السينما كليب، وظهر لينا طلعت زين وكأنه زي نجوم الزمن الجميل.

قشر البندق

أغنية «لحميد الشاعري» إتغنت في فيلم «قشرالبندق» اللي كانوا عاملين فيه مسابقة أكل واللي معظمنا كان نفسه يشارك في المسابقة ديه من كتر حلاوة الأكل اللي كان فيها. الاغنية ديه كانت من إنتاج سنة 1995 وكانت من كلمات عادل عمر وألحان وتوزيع موسيقي حميد الشاعري ، وقشر البندق برده كان اسم ألبوم حميد الشاعري رقم 13 اللي كان من إنتاج شركة الشرق الأوسط.

عيني

«حميد الشاعري وهشام عباس» كانوا دويتو مبهج جدًا وهما بيغنوا الأغنية ديه ومش بس وهما بيغنوا لأ ده كمان كانوا سبب في اننا نفطس على روحنا من الضحك بسبب المواقف الكوميدية اللي بيتعرضوا ليها. أغنية عيني كانت من ضمن ألبوم حميد اللي كان بنفس اسم الاغنية واللي تم إصداره سنة 1997 وكان من إنتاج شركة عالم الفن. وفي الأغنية ديه كمان ظهرت الفنانة «نيكول سابا» كموديل.

عودوني

ألبومات «عمرو دياب» كلها في فترة التسعينات ليها مكانة خاصة جوا كل واحد فينا. وأغنية «عودوني» من الأغاني الجميلة اللي أثرت فينا لدرجة إننا قعدنا نحرك إيدينا وقتها زي الموديل اللي كانت في الكليب وكمان أفتكر إن عبلة كامل كانت بتحرك إيديها برضه زي الموديل في مسلسل إمرأة من زمن الحب. الأغنية دي كانت من ضمن ألبوم عودوني اللي تم إصداره سنة 1998.

وأنا أعمل إيه

«هشام عباس» دايمًا أول ما يغني تلاقيك بتدندن وراه الأغنية على طول، صوته من الأصوات اللي بتتسرسب جوا الواحد. وأغنية «وأنا أعمل ايه » من الاغاني اللي كلنا قعدنا ندندنها ونغنيها أول لما نزلت في ألبوم حبيتها اللي تم إصداره سنة 1998.