متتعصبش عشان ترد صح.. 5 طرق عشان تهدى وترتاح
أوقات كتير بنكون متعصبين جامد ومش عارفين إزاي نسيطر على عصبيتنا دي. لكن في الموضوع ده المترجم من موقع «Life hack» هنقولك على طرق تطلع بيهم العصبية اللي جواك.
طلع عصبيتك في ورقة
هات قلم وورقة واكتب فيها كل حاجة معصباك وده ليه عامل إنه هيساعدك إنك ترتاح نفسيًا وتهدا بدل الفوران اللي أنت فيه.
العب رياضة
اتمشى.. اعمل أيروبكس.. روح الجيم.. اعمل أي رياضة لأن ليها دور قوي في إنها تخرج طاقة الغضب اللي جواك.
ممكن تعلق مخدة مثلًا في أوضتك وتقعد تديها بوكسات وكأن المخدة دي هي كل حاجة معصباك، ولما تضرب الحاجة اللي معصباك هتخرج طاقة غضب وفي نفس الوقت هتحس براحة نفسية.
خد نفس قبل رد فعلك
أول ما تحس إنك هتاخد رد فعل عصبي تجاه الشخص أو الشيء اللي عصبك. خد نفس لمدة دقيقة واحدة عشان ده هيخليك تعرف تتعامل بهدوء من غير نرفزة.
استريح واتعامل
متتعصبش أبدًا وأنت حاسس إنك مرهق لأنك لو اتعصبت ممكن تقول كلام انت مش قاصده فالموقف ممكن يتعقد أكتر وأحسن حاجة إنك تروح بيتك وتهدا وتاخد كفايتك من النوم وتصحى وتفكر بهدوء إزاي تتعامل.
اسمع عشان تعرف تعبر
قبل ما تبدأ بسرعة تتعصب على الحد اللي نرفزك خد نفس زي ما قولنا في النقطة رقم 3 واسمعه كويس متلحقهوش في الكلام ولما يخلص ابتدي اتكلم وعبر عن اللي عايز تقولوا بهدوء.
لو اتعصبت من الأول هتلاقي نفسك مش عارف توصل اللي عايز تقولوا لأن زعيقك مغطي على كلامك. وكل ما هديت وامتصيت غضبك كل ما قدرت تعبر.
⇓نرشح لك⇓
