روّق البيت وظبط الزبون.. نصائح اعملها لما تيجي تبيع شقتك

روّق البيت وظبط الزبون.. نصائح اعملها لما تيجي تبيع شقتك

لو عندك شقة وعايز تبيعها وتعمل بفلوسها مشروع معين أو تجيب شقة تانية في مكان أحسن أو حد من أصحابك قالك إنه عايز يبيع شقته، هنقولك في الموضوع ده على حاجات تعملها وتنصح بيها صاحبك عشان يجهز شقته للبيع.

جهز أوراقك

جهز كل الأوراق الخاصة بالبيت من عقد وفواتير كهرباء ومية وغيرها من الأوراق عشان تكون جاهزة لما المشتري يطلب يشوفها ويطمن إن كل الأوراق سليمة.

فضي البيت

من أي حاجة شخصية ليك عاملة كركبة عشان تبين مساحة الشقة قصاد المشتري اللي جاي عشان يقدر يشوف تفاصيلها ويشوف إذا كان تستاهل السعر اللي أنت طالبه فيها ولا لأ.

خليك صريح

لو فيه أي تصليحات قمت بيها في الشقة أو أي مشاكل كانت موجودة وأنت حلتها قولها للمشتري. خليك صريح معاه عشان كل ما كنت صريح معاه كل ما وثق فيك وفكر إنه يشتري الشقة.

اعمل تعديلات

لو فيه عفش متكسر صلحه لو حيطة بايشة بيضها بياض لونه حلو. عدل البيت بتفاصيل حلوة زي إنك تحوط ورد مثلًا في المدخل بتاعه.

وكل ده هتعمله عشان تحلي الشقة في نظر المشتري ويحس إن قد إيه السعر اللي أنت طالبه يستاهل إنه يدفعه في الشقة من كتر حلاوتها.

ريحة منعشة

افتح الشبابيك هوي البيت واتأكد إن مفيش ريحة وحشة فيه بص على الحمام واتأكد إنه متنضف كويس وريحته كويسة. ادخل على المطبخ وشوف إذا كان فيه صراصير ولا لأ ولو فيه هات مبيد حشري ورش.

ومع كل ده استخدم معطر جو يكون ريحته حلوة جدًا ورش في كل ركن في البيت. عشان المشتري يحس بإن المكان نضيف وريحته كويسة. لأن الريحة الوحشة هتخليه يقرف من المكان وعايز يمشي بسرعة منه.

كرم ضيافة للمشتري

بمعنى إنه قبل ما يشوف الشقة تقوله تحب تشرب إيه وتصر على ده وتقوم تجيبله مشروب ومعاه حاجة حلوة وده بيساعد في إنك تعمل تهيئة نفسية للمشتري وتخليه مبسوط من تعاملك. وديه من الحاجات اللي هيحطها في باله وهو جي يشتري الشقة.

ديه الحاجات اللي لازم تعملها عشان تجهز البيت للبيع ولو عايز تبيع شقتك في أقصى وقت ممكن فيه مواقع بتسهلك إنك تعرض عليها بيع شقتك زي موقع  ebay و أوليكس.

المصدر 

المراجعة

كيف-تتخلص-من-عادات

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»

ميكس ميديا