«الحب مينفعش معاه هحاول اغيره».. هكذا تكون العلاقة السوية
معظمنا لما بيدخل في علاقة بيبقى شايف إن أصعب خطوة هي خطوة الاعتراف بالحب، وإنه مع الوقت هيقدر يغير بحبه أي حاجة في الشخص ده، طيب وليه تدخل نفسك في علاقة من الأساس فيها شد وجذب؟
وهل يا ترى ده المفروض اللي يكون في أي علاقة عاطفية؟ ولا الصح إننا نخليها علاقة سوية قايمة في الأساس على قبولنا للطرف التاني من غير أي شروط.
مش معنى كده إننا نيجي على نفسنا بس لازم نحطها قاعدة في حياتنا إن الحب مينفعش معاه «هحاول اغيره»، لأنك يا إما تقبل الشخص بعيوبه ومميزاته يا إما متدخلش العلاقة من الأول.
في التقرير ده «شبابيك» بيقدملك مجموعة نصائح هتعرف بيها إذا كنت في علاقة سوية مع شريك الحياة ولا لأ.
- العطاء بدون مقابل
لازم تعرف إن الحب مفيهوش مقابل، ولو فيه فالمقابل ده مينفعش يتطلب، يعني مينفعش تطلب منه اهتمام مقابل اهتمامك أو إنه يفتكر عيد ميلادك زي ما أنت خططت ليه من قبلها بشهور، الحب مشاعر تلقائية بتطلع لوحدها.
غير كده مفيش حد بيحب فعلًا مش هتلاقيه مهتم، بس لو كان الشخص ده طبعه كده يا إما من الأول توافق عليه بطبعه وتعرف إزاي تتعامل معاه يا إما ترفض الدخول في العلاقة من الأول؛ لإنك لو حاولت وقولت لنفسك هتعرف تغيره هتكون أنت الخسران وتفضل في صراعات جوه علاقة مش سوية.
اقرأ أيضًا⇐«عشان ترتاحي».. ابتعدي عن هؤلاء الرجال
- قبول الشريك
مفيش حد من البشر كله مميزات، يعني زي ما هتلاقي عيوب هيكون في مميزات كمان، بس يا ترى إيه الصح إنك تخلي العيوب دي عائق في حياتكو وتفضل وراه لحد ما يبطلها تمامًا؟ ولا الأفضل إنك تحسسه في كل لحظة إنك بتحبه بكل ما فيه حتى لو كانت عيوب.
في الوقت ده هو لو بيحبك فعلًا هيتغير علشانك أنت مش عشان أي حد تاني، وبلاش تنسى إن طريقة المدرس اللي شايف إنك فيك مشاكل مش هتجيب نتيجة معاه.
- الرغبة في الاستمرار
لو أنت من الشخصيات اللي كل فترة بتطلب الانفصال ولاقيه نفسها مش قادرة تكمل، اعرف إنك في علاقة مش سوية؛ لإن ببساطة الحب الحقيقي بيبقى عاوز يكمل معاك مهما قابلتكم أي مشاكل.
لازم تعرف كمان إن ده مش مؤشر صح وخصوصًا بالنسبة للعلاقات اللي في بدايتها؛ لإن الجواز بيتوج أي علاقة علشان تكمل مشوار بدأته بالحب، فياريت من دلوقتي لو لقيت نفسك مش هتقدر تكمل حاول تبعد علشان ميأثرش عليك بعد كده.
- مصدر للأمان
إزاي نقدر نقول على أي علاقة إنها سوية من غير ما يكون فيها أمان؟.. تقريبًا مفيش علاقة بتستمر لو مفيهاش أمان من الطرفين مش بس ناحية الولد، لا كمان ناحية البنت.
ببساطة لإن إحساس الأمان هو الوحيد اللي بيخلي الطرفين يستحملوا أي مشاكل تحصل، وبالتالي هيقدروا يكملوا وده على العكس تمامًا لو مفيش أمان العلاقة هنا هيبقى ناقصها حاجات كتير أهمها إنها تبقى سوية يعني فيها طرفين عاوزين بعض وبيوصلوا لده بكل الطرق، مش طرفين لما بيحتاجوا بعض مش بيلاقوها.
اقرأ أيضًا⇐لعلاقة متجددة مع شريك حياتك.. اتبع هذه الخطوات
- التفاهم الواضح
لو دايمًا لاقي إن الخناق بينكم بيزيد يوم بعد يوم، يبقى مفيش تفاهم وصعب إنه يبقى موجود بعد كده، العلاقات دي مرهقة جدًا لإن التفاهم بيبان من أول لحظة في العلاقة.
واوعى تفتكر إن مع الوقت في أي حاجة هتتغير، بالعكس دي مع المشاكل قلة التفاهم هيبقى أكتر لدرجة إنك مش هتعرف تسيطر على الوضع بينكم، علشان كده لازم يبقى في تفاهم واضح من أول لحظة تبني عليه بعد كده العلاقة.
⇓⇓اخترنا لك⇓⇓
